Në Komunën e Ulqinit, me shumicë shqiptare të dielën u mbajtën zgjedhjet vendore, në të cilat garuan 5 lista zgjedhore.
38 qendrat e votimit në zgjedhjet lokale të Ulqinit u mbyllën në orën 20:00. Në këtë komunë të drejtë vote kanë mbi 20 mijë banorë, por sipas raporteve të komisionit komunal të zgjedhjeve në Ulqin, vetëm rreth 55 % e tyre morën pjesë në votime.
Procesi zgjedhor në Komunën e Ulqinit, sipas zyrtarëve komunal dhe vëzhgueseve, u ishte i qetë dhe pa ndonjë parregullsi të theksuar. Ata thanë se edhe aspekti teknik i procesit zgjedhor ishte i rregullt dhe pa ndonjë shkelje proceduriale.
Partitë politike shqiptare garuan të ndara në tre lista zgjedhore, kurse për herë të parë u formua një koalicion parazgjedhor nga dy partitë politike shqiptare Partia Demokratike dhe Alternativa Shqiptare dhe tre parti të tjera, nmes tyre edhe Lëvizja Qytetare “URA” e mandatarit për qeverinë e re të Malit të Zi, zotit Dritan Abazoviç.
Përballë këtij koalicioni garojnë të ndara Forca e Re Demokratike, koalicioni i Unionit Demokratik i Shqiptarëve bashkë me Lidhjen Demokratike dhe Partia Demokratike e Socialistëve të presidentit Milo Gjukanoviç.
Për herë të parë në këto zgjedhje u hap qendra e thirrjeve të Ministrisë së Brendshme, ku me anë të telefonimit qytetarët kishin mundësi të raportonin për parregullsi të mundshme lidhur me procesin zgjedhor dhe me numërimin e votave.
Kuvendi i qytetit të Ulqinit ka 33 vende dhe forcat politike që fitojnë shumicën zgjedhin kryetarin e komunës.
Edhe në qytetin verior të Malit të Zi, në Berane u mbajtën zgjedhjet vendore ku pjesëmarrja e votuesve ishte më e madhe, duke arritur në gati 70%.
Në këtë komunë garuan 8 lista zgjedhore dhe lufta më e ashpër politike bëhet mes Partisë Demokratike Socialiste të presidentit aktual të Malit të Zi, Milo Gjukanoviç dhe partive pro-serbe dhe pro-ruse që po përpiqen ta ruajnë pushtetin në këtë komunë.
Rezultatet paraprake të zgjedhjeve vendore pritet të njoftohen të dielën në mesnatë, kurse rezultatet zyrtare pritet të publikohen të hënën.
