Përveç 20 milionë Euro që parashikohet t’ua dhurojë Balluku nga taksat e shqiptarëve, SPAK të hetojë se ku do t’i gjejnë 17 milionë Euro të tjera, që duhen për këtë projekt prodhimi energjie me erë; sepse vjen “erë” fakti që dy ortakët hollandezë misteriozë nuk kanë kapital për vlerën e investimit për këtë koncesion, madje firma e tyre ka vetëm 1 punonjës, ndërsa dy vëllezërit Zhukri figurojnë të punësuar te bizneset e nënës së tyre me pagë mujore 30 mijë lekë secili
Për të justifikuar krizën financiare energjitike, të shkaktuar prej paaftësisë e vjedhjes me shitje lirë dhe blerje shtrenjtë, kryeministri Rama dhe ministresha Balluku, deklaruan se janë gati dy projekte koncesionare, për prodhim energjie me park fotovoltaik e impiante përmes erës.
Burime nga Ministria e Ekonomi-Financave, kanë bërë me dije për “Pamfleti”, se e vetmja firmë që ka aplikuar deri tani për koncesion prodhimi energjie me erë, është “BS GREEN AL sh.p.k”, për miratimin e të cilës, po pritet vetëm vendimi i kryeministri Rama.
Sipas të dhënave tatimore, rezulton se kjo firmë është kompani shqiptaro-holandeze me 4 ortakë, dy prej të cilëve janë djemtë e Agron Zhukrit, gjyqtarit që i dha vulën e PD-së personit “non grata” Sali Berisha, ish-shefit të gruas së tij, por dhe shef i tij kur ai punonte shofer në gazetën “RD”.
Në këtë firmë të krijuar më 20 maj 2020, vëllezërit Arold e Lorin Zhukri, kanë nga 25% ortakëri, po kështu dhe dy holandezët Aschëin Schmdit e Martin Boermans kanë nga 25% ortakëri.
Por deri tani, megjithëse kanë kaluar 2 cikle bilancesh vjetore, firma e tyre e përbashkët koncesionare “BS GREEN AL sh.p.k”, nuk ka asnjë bilanc tatimor, përveç kapitalit themeltar 100 mijë lekë dhe 1 punonjës me detyrë “Këshilltar Ligjor”, i cili është vetë ortaku Lorin Zhukri.
Dy holandezët, janë maskuar pas firmave “ASCHËIN SCHMIDT BEHEER B.V” dhe “MARTIN BOERMANS BEHEER B.V”, për të cilat nuk kanë depozituar në QKB asnjë historik aktiviteti të tyre apo specifikime identiteti, ndërsa në emër të tyre ka firmosur Lorin Zhukri.
Por sipas të dhënave që disponon Ministria e Ekonomi-Financave, rezulton se këto janë kompani offshore me aktivitet hije, në sektorët e sekserizimit apo kapjes së koncesioneve të energjisë në vendet si Shqipëria, si dhe për ndërmjetësime financiare e pasuri të paluajtshme.
Për koncesionin e prodhimit të energjisë me erë, është menduar të jepen 3 impiante në tre zona industriale e turistike, kundrejt investimit paraprak me vlerë 20 milionë Euro nga qeveria, ndërsa 17 milionë Euro do t’i investojë firma koncesionare.
Deri tani, favorite e vetme për këtë koncesion me 3 impiante, rezulton të jetë firma “BS GREEN AL sh.p.k” e holandezëve offshorë dhe dy djemve të gjyqtarit, që i dha Saliut vulën e PD.
Mbase për këtë firmë e kanë patur fjalën kryeministri Rama e ministresha Balluku, kur deklaruan se së shpejti, do fillojë dhe një investim koncesionar serioz për prodhim energjie me erë.
Po saktësisht me dokument zyrtar, dimë faktin që dy djemtë e gjyqtarit Zhukri, më 28 shtator 2019 kanë hapur dhe firmën tjetër “ARLO Energy Sh.p.k” nga 50% ortakëri secili, me objekt të njëjtë për koncesione e menaxhim prodhimi energjie me erë.
Qeveria do t’u japë 20 milionë Euro për koncesionin “BS GREEN AL shpk”, mirëpo SPAK duhet të hetojë, se ku do t’i gjejnë 17 milionë Euro te tjera djemtë e gjyqtarit Agron Zhukri.
Mbasi sipas regjistrit tatimor, ata figurojnë punonjës te dy bizneset e “AR&LO Travel-Blu Tour Operator Shpk” dhe “ALL-SIG BROKER Sh.p.k” të nënës së tyre Rezarta Zhukri, me pagë 30 mijë lekë në muaj secili; por hetim duhet bërë dhe për burimet financiare të dy ortakëve holandezë./Pamfleti
