Gjykata kundër Korrupsionit dhe Krimit të Organizuar (GJKKO) ka firmosur plot 24 urdhër-arreste përsa i përket çështjes së inceneratorëve të Elbasanit dhe Fierit.
Ndërkohë, Policia e Shtetit ka nisur që në orët e para të mëngjesit arrestimet e personave në fjalë, ndërsa deri më tani mësohet se janë vënë në pranga 7 persona, 5 të tjerë janë në kërkim, ndërsa 8 vijojnë të jenë në gjendje të lirë.
Mes personave të cilët janë arrestuar ose pritet të arrestohen në lidhje me skandalin e inceneratorëve janë zyrtarë të lartë dhe biznesmenë, njëri prej të cilëve është edhe ish-administratori i një kompanie, i identifikuar si Florian Muça, aktualisht drejtori i AlbPetrol!
Në pranga ka rënë gjithashtu edhe Loran Dusha, me detyrë Administrator i Inceneratorit të Fierit. Po ashtu, urdhër – arresti është lëshuar edhe për Arjola Kodrën, administratore e Inceneratorit të Tiranës, Integrated Energy BV SPV.
Operacioni për ndalimin e personave të tjerë në kërkim vijon edhe në këto momente, ndërsa mësohet se, SPAK ka marrë indicie edhe nga gjetjet e dala nga Komisioni Hetimor i zhvilluar pak kohë më parë.
Ky Komision Hetimor thirri për të dëshmuar edhe disa administratorë dhe punonjës të 3 inceneratorëve, të Fierit, Elbasanit dhe të Tiranës. Kujtojmë se në kërkim për këtë çështje janë shpallur Mirel Mërtiri, Stela Gugallja si dhe Klodjan Zoto.
