Drejtuesit e PD zyrtare kanë apeluar njohjen e Kuvendit Kombëtar të 17 korrikut 2021, ndryshimet statutore dhe vendimet e marra po nga ky Kuvend i thirrur nga ish-kreu i PD, Lulzim Basha.
Dje, Gjykata e Tiranës publikoi një njoftim për mediat lidhur me kronologjinë e regjistrimeve të dy Kuvendeve të PD të mbajtura në 17 korrik 2021 dhe 11 dhjetor 2021, kjo e fundit e thirrur nga Komisioni i Rithemelimit të PD dhe të ankimimeve të tyre nga vetë PD zyrtare.
Organi gjyqësor i kryeqytetit zbuloi për mediat dhe publikun se vetë krerët e selisë blu kanë apeluar njohjen e Kuvendit dhe ndryshimeve të statutit të 17 korrikut. Por, Gjykata e Tiranës nuk saktëson se në cilën datë është bërë kjo kërkesë e dytë nga PD zyrtare dhe se çfarë kërkon konkretisht lidershipi zyrtar demokrat për 17 korrikun.
Mbajtja e fshehtë e kësaj kërkese edhe nga selia e partisë më të madhe opozitare ngre dyshime se çfarë loje procedurale po kërkon të ndjekë kupola e PD për të rrëzuar dhe delegjitimuar “Foltoren” dhe ish-kryeministrin Sali Berisha.
“Kërkesa me Nr. 214 Akti, datë 13.12.2021 regjistrimi, me kërkues: Partia Demokratike e Shqipërisë, përfaqësuar nga Sekretari i Përgjithshëm z. Gazment Bardhi me objekt: Pasqyrimin e ndryshimeve të Statutit të Partisë Demokratike të Shqipërisë dhe të organeve të reja të zgjedhura në Kuvendin Kombëtar të datës 17.7.2021, është gjykuar nga gjyqtare znj. Blerina Muça, e cila me vendimin e datës 18.03.2022, ka vendosur:
‘1. Pranimin e kërkesës së palës kërkuese Partia Demokratike e Shqipërisë. 2. Depozitimin e statutit dhe vendimeve të dala nga Kuvendi Kombëtar i Partisë Demokratike të Shqipërisë e datës 17.07.2021. 3. Kundër këtij vendimi mund të bëhet ankim sipas ligjit’. Kundër këtij vendimi është paraqitur ankim nga vetë pala kërkuese dhe kjo dosje do t’i përcillet Gjykatës së Apelit Tiranë për shqyrtimin e tij”, thuhet paraprakisht në njoftimin e djeshëm të Gjykatës së Tiranës.
Dy standarte për ankimimet nga Gjykata e Tiranës
Një tjetër paradoks në njoftimin e dhënë për ankimimin e kreut të komanduar të PD, Enkelejd Alibeaj në 5 prill për shfuqizimin e vendimit të 25 marsit nga gjyqtari Agron Zhukri i cili njohu Komisionin e Rithemelimit të PD, Kuvendin e 11 dhjetorit 2021 dhe vendimet e këtij Kuvendi, saktësohet ankimuesi, objekti i kërkesës dhe data e ankimimit. Në rastin e apelimit të PD zyrtare për Kuvendin e 17 korrikut 2021 nuk saktësohet se cili është përfaqësuesi i PD që ka bërë ankimimin, datën dhe objektin e tij.
“Kundër këtij vendimi është paraqitur ankim nga Partia Demokratike e Shqipërisë përfaqësuar nga z. Enkelejd Alibeaj, në datë 05.04.2022. Kjo kërkesë me Nr. 508 Akti, është regjistruar në datë 05.04.2022, me objekt disponim mbi ankimin: ‘Prishjen e Vendimit Nr. 1346/222 Akti Nr. 3 Vendimi, datës 25.03.2022 të Gjykatës se Rrethit Gjyqësor Tiranë me gjyqtar Agron Zhukri duke vendosur pushimin e gjykimit ose kthimin e saj për shqyrtim në të njëjtën gjykatë, por me tjetër trupe gjykuese’ , e cila pasi është shortuar do të gjykohet nga gjyqtare znj. Blerina Muça”, thuhet më tej në njoftimin e Gjykatës së Tiranës.
Berisha duhet të presë vendimin e gjyqtares Muça
Më tej, komunikohet se Gjykata e Tiranës do të japë vendim të formës së prerë për kërkesën e Alibeajt kundër “Foltores” dhe Kuvendit të 11 dhjetorit 2021, por ende nuk bëhet me dije se në cilën datë do të zhvillohet ky proces gjyqësor. Mbështetësit e ish-kryeministrit Sali Berisha duhet të presin fjalën e fundit të gjyqtares Blerina Muça, e cila është zgjedhur për të shqyrtuar nëse do të pranohet ose jo kërkesa e kryetarit të përkohshëm të PD, Enkelejd Alibeaj për anulimin e vendimit të 25 marsit nga gjyqtari Agron Zhukri ose rishqyrtimin e çështjes me një trupë të re gjykuese.
“Në të gjitha rastet, pavarësisht vendimmarrjes së znj. Muça, vijimësia e procedurës administrative të çështjes Nr. 222 Akti, do t’i nënshtrohet parashikimeve të Vendimit Nr. 222, date 06.11.2019 ‘Mbi formën e prerë të vendimeve’ të Këshillit të Gjykatës, të cilin do të mund ta gjeni bashkëlidhur këtij informacioni. Gjykata e Rrethit Gjyqësor Tiranë, e udhëhequr ndër të tjera edhe nga parimi i transparencës, është në gatishmëri të publikut dhe medias për çdo informacion sqarues”, mbyllet njoftimi i Gjykatës së Tiranës.
Vendimi i gjyqtarit Zhukri në 25 mars nuk është regjistruar në Regjistrin e Partive Politike teksa Alibeaj e ka ankimuar këtë gjë në Gjykatën e Apelit. Edhe pse ligjërisht Berisha duhet të presë vendimin përfundimtar të drejtësisë për legjitimimin se cila palë do të drejtojë PD, ai ka kërcënuar se kushdo që rrëzon vendimin e gjyqtarit Zhukri në 25 mars, do të përballet me pasoja.
