Përparim Kalo, një ndër avokatët e njohur, aktualisht gjyqtar në Gjykatën Kushtetuese, është mbështetur nga organizata me peshë që veprojnë në fushën e ligjit e të shërbimeve ligjore, studimeve ndërkombëtare, atë të të drejtave të njeriut, të ndërmjetësimit etj.
“Mbështetur në përvojën e tij si jurist dhe punën në institucionet shtetërore, integritetin personal e profesional, pavarësinë nga politika dhe përkushtimin e treguar në interes të zhvillimit të vendit, në përgjigje të ftesës që ju bë shoqërisë civile për mendim, propozojmë z. Përparim Kalo si një figurë me dinjitetin e duhur për të qenë President i Republikës së Shqipërisë,” thuhet në letrën e përbashkët të nënshkruar nga 5 prej organizatave të lartpërmendura. Kalo, 64 vjeç, është shquar në komunitetin e avokatisë dhe mban lidhje të ngushta me organizata kombëtare e ndërkombëtare prej vitesh.
Ai ka shërbyer edhe si Konsull Nderi i Mbretërisë së Danimarkës në Shqipëri. “Ai di të qëndrojë mbi partitë politike dhe të përputhë interesat e shtetasve me ato të politikës, por brenda normave kushtetuese, çka është me rëndësi kur kemi parasysh funksionet rëndësishme që ushtron Presidenti i Republikës,” thuhet në letrën e njërës organizatë.
Një tjetër organizatë thekson mbështetjen që Kalo i ka dhënë kauzës së ndihmës humanitare të emigrantëve nga Kosova të ardhur në Shqipëri gjatë luftës në vitin 1999 si dhe nënvizoi pavarësinë e tij nga politika. “Ai ka qenë flamurtar në iniciativat nxitëse të përgjegjësisë sociale të biznesit dhe të fushatave për fytyrën njerëzore të biznesit si dhe në luftën për mbrojtjen e mjedisit dhe atë kundër korrupsionit,Ai është personi i duhur për të mbrojtur interesat e Shqipërisë e të Shqiptarëve kudo që ata jetojnë.”, thuhet më tej në letrën e saj.
Kalo ka qenë një ndër themeluesit e qendrës së zgjidhjes së mosmarrëveshjeve, projekt i mbështetur nga qeveria e Danimarkës dhe kontribuoi rreth 7 vjet si anëtar bordi, si dhe në hartimin e ligjit për ndërmjetësimin, sëbashku me jurist të shquar vendas dhe ekspertë të huaj, thuhet në letrën e një tjetër organizate. Në fillim të këtij muaji, një burim diplomatik në Tiranë i tha “Tirana Times” se dihet që zgjedhja e kryetarit të ri të shtetit është në dorë të Kuvendit. Megjithatë,Kalo shihet si figurë e admirueshme.
“Në të vërtetë ne dëshirojmë të shohim një president të respektuar e me autoritet, integritet dhe që sigurisht qëndron mbi partitë politike”, vuri në dukje burimi në fjalë. “Tirana Times” nga ana e vet i kushtoi një editorial Kalos në një numër të mëparshëm të këtij muaji.
“Arsyet që e bëjnë z. Kalo kandidat të përshtatshëm dhe të vlerësuar nga të gjithë janë autoriteti dhe integriteti i tij.” thuhej në atë editorial. Kalo ka kryer studime universitare e pasuniversitare në Shqipëri dhe më pas ka fituar titull Master për të drejtën amerikane dhe ndërkombëtare në kuadrin e një programi të kombinuar nga Universitetet e Suffolk Boston me ato të Budapestit dhe Lundit, Suedi. Në karrierën e tij profesionale shënohet zyra e avokatisë Kalo and Associates, e themeluar prej tij.
Ajo është mjaft e vlerësuar dhe përfaqëson e këshillon disa nga shoqëritë dhe organizatat më të mëdha botërore si dhe bizneset dhe sektorin publik në Shqipëri. Kalo njihet edhe si mbështetës i trashëgimisë kulturore dhe sidomos i arteve pamore, të cilën e kryen me pasion nëpërmjet fondacionit të artit dhe galerisë që mban emrin e tij, por ka mbështetur edhe Galerinë Kombëtare të Arteve dhe institucione të tjera publike. Ai është dekretuar nga Mbretëresha e Danimarkës dhe dekoruar nga Presidenti i Austrisë si dhe ka marrë çmime e vlerësime të tjera të rëndësishme brenda e jashtë vendit.
Kuvendi pritet të shqyrtojë disa propozime dhe ti fusë ato në votim. Sipas Kushtetutës, presidenti konsiderohet figurë që duhet të përfaqësojë unitetin e popullit, pra idealisht nuk duhet të jetë aktor politik. Ndërkohë që zgjedhja e tij në të kaluarën ka qenë zakonisht produkt i politikës, tashmë në rend të ditës duket se ka dalë nevoja për të zgjedhur një person jashtë politikës, me profil si ai i Kalos.
