SPAK justifikohet me argumentin se nuk janë në kompetencë të saj hetimet për prokurorët e rretheve. Por nga një vëzhgim edhe në të dhënat e Prokurorisë së Përgjithshme për vitin 2021, rezulton se në rrethe nuk ka asnjë nisje hetimi për të ngelurit në veting. Pra të gjithë shijojnë milionat.
Gjyqtarët dhe prokurorët e ngelur në veting po shijojnë në qetësi paratë korruptive që vunë gjatë gjithë këtyre viteve. Sipas të dhënave të siguruara nga Komisioni i Pavarur i Kualifikimit, deri në fund të marsit janë dhënë 513 vendime. Nga këto, 199 vendime konfirmimi; 191 vendime për shkarkimin nga detyra, ndërsa për 86 persona është ndërprerë procesi për shkak të dorëheqjes.
Nëse fusim dhe statistikat e prillit dhe majit, kemi më shumë se 200 të ngelur në veting, ndërkohë që bashkë me të dorëhequrit shkojnë afro 300. Pothuajse që të gjithë janë larguar nga sistemi për mosjustifikim të pasurisë. Shumica kanë fshehur pasuritë që kanë deklaruar ndër vite. ILDKP ka dështuar në zbulimin e tyre, por KPK i gjeti dhe i shkarkoi.
Por topi ka kaluar në sistemin e drejtësisë dhe ajo që bie në sy është se sot nuk ka asnjë të ngelur në veting pas hekurave. Llalla ishte i pari i dorëhequr, por ai iku u arratis. SPAK ka nisur hetim vetëm për 10 ish-anëtarë të Gjykatës së Lartë dhe Kushtetuese. Në gusht 2021, SPAK dërgoi për gjykim ish-kreun e Gjykatës Kushtetuese, Bashkim Dedja dhe ish-gjyqtarin Fatos Lulo, të cilët akuzohen për “fshehje pasurie” si dhe po vazhdon hetimet ndaj Shkëlzen Selimit, Guxim Zenelajt dhe Admir Thanzës. Ndëkrohë u kërkua pushim hetimesh për ish-kreun e Gjykatës së Lartë, Xhezair Zaganjori dhe ish-gjyqtarët Aleksandër Muskaj, Artan Zeneli, Besnik Imeraj, Edmond Islamaj, Gani Dizdari dhe Tom Ndreca. Deri më tani nuk ka pasur asnjë zhvillim me këto raste.
Ajo që bie në sy është se në të dhënat që ka publikuar SPAK për vitin 2021, rezulton se ka në dorë vetëm 5 raste për fshehje pasurie, ku mes tyre ka dhe politikanë. Ndërkohë po sipas të dhënave, ka një rënie të ndjeshme të procedimeve për veprën “Korrupsionin pasiv të gjyqtarëve, prokurorëve dhe funksionarëve të tjerë të organeve të drejtësisë”. Një vit më parë bëhej me dije se ishin të proceduar 45 persona, ndërsa në raportin e vitit 2021 theksohet se janë hetuar për këtë vepër 38 persona.
SPAK justifikohet me argumentin se nuk janë në kompetencë të saj hetimet për prokurorët e rretheve. Por nga një vëzhgim edhe në të dhënat e Prokurorisë së Përgjithshme për vitin 2021, rezulton se në rrethe nuk ka asnjë nisje hetimi për të ngelurit në veting. Pra të gjithë shijojnë milionat.
Ka dhe nga ata që kanë nisur t’i “pastrojnë”. Kjo pasi shumë nga të ngelurit në veting janë kthyer në avokatë. Një ndër ta është ish-kreu i Kushtetueses Bashkim Dedja. Tjetër emër është ish-gjyqtari Artan Broci. Po ashtu në lista ka emra si: Adriatik Cama, Antoneta Sevdari, Rovena Gashi apo Petrit Fusha. Përveç emrave që janë shkarkuar nga vetingu, janë dhe shumë të tjerë që janë dorëhequr nga detyra dhe i janë futur fushës së avokatisë. Arjana Fullani, ish-anëtare e Gjykatës së Lartë dhe bashkëshortja e Ardian Fullanit rezulton sipas QKB që ka hapur zyrë avokatie.
Pra duket qartë që të ngelurit në veting mund të shijojnë të qetë milionat që kanë grabitur ndër vite, pasi nuk u hyn gjemb në këmbë. /Pamfleti
