Stadiumi i Evian do të presë ndeshjen miqësore mes Ukrainës dhe Shqipërisë, ndeshje e planifikuar për të dielën më 3 qershor. Natyrisht, ukrainasit janë duke nxjerrë lloj-lloj pretendimesh që dueli miqësor të mos zhvillohet në këtë stadium, sepse nuk plotëson standardet. Në fakt, Ukraina është grumbulluar sot në Evian për një kamp stërvitor duke filluar përgatitjet për miqësoren me Marokun që luan nesër si dhe ndeshjen e mundshme me Shqipërinë që është planifikuar për të dielën. Ukrainasit kishin rënë dakord për zhvillimin e miqësores në Evian, por me sa duket u kishte shpëtuar fakti se do ta luanin takimin ndaj kuqezinjve pikërisht në stadiumin ku në ditët e ardhshme do të zbresin çdo ditë për të bërë stërvitje, siç ua kishte siguruar kompania që u kishte rregulluar fazën përgatitore në Francë.
Impianti në fjalë, “Camille Fournier Stadium”, është i përshtatshëm për faza përgatitore pasi ka kushtet që duhen për një ekip që stërvitet atje. Jo rastësisht, ajo ishte baza ku Gjermania përgatiti Euro 2016, ndërsa në verë klubet e Liverpulit, Sauthempton e Leister do të kryejnë atje fazën përgatitore.
“Por stadiumi që ka një minitribunë e një kodër me bar ngjitur saj, nuk plotëson asnjë kusht normal për zhvillimin e një ndeshje të tillë, Ukraina kishte fillimisht shqetësimin se duke u stërvitur çdo ditë aty, fusha nuk do të ishte në kushtet më të mira të mundshme për ndeshjen në fjalë. Pastaj është edhe çështja e orarit të sfidës. Ukrainasit nuk kanë dashur që në fillim të luhet në orën 16:00, krejtësisht e papërshtatshme duke llogaritur temperaturat e larta, ndërsa impianti nuk ka ndriçimin e përshtatshëm që ndeshja të luhet më vonë në darkë”, shkruan “Vip Sport”.
Kjo ka bërë që ata të kërkojnë anulimin e ndeshjes në fjalë dhe janë të gatshëm të kalojnë javën duke kryer vetëm stërvitje dhe ndeshje kontrolli, vetëm që të mos luajnë në kushte të tilla. Nga ana tjetër, FSHF pranon gjithçka dhe nuk është çudi që pikërisht gjendja e fushës dhe vapa e orarit të ndeshjes të dëgjohet si justifikim për paraqitjen e kuqezinjve. Përtej atyre që janë shkruar, duket se ukrainasit, njësoj si edhe kombëtarja jonë, po mendojnë si ta kalojnë këtë miqësore, si një duel thjesht statistikor.
