Nxitimi për të mbyllur komandimin e Partisë Demokratike prej tij, duke zgjedhur forumet e reja, kryetarët e rinj të degëve, Këshillin kombëtar, dhe t’i japë fund gjithë procesit duke u rikthyer në 22 Maj në krye të selisë blu, duket se i ka kushtuar rëndë Sali Berishës.
Duke filluar që nga bojkoti i 35 deputetëve, të cilët nuk pranuan të merrnin pjesë në Kuvendin e organizuar nga Komisioni i Rithemelimit, duke bërë tashmë edhe më të qartë çarjen në grupin parlamentar të opozitës, burime të Gazetës “Sot” bëjnë me dije se “Foltorja” ditët e fundit është zhytur në një krizë shumë të thellë.
Sherret dhe debatet brenda grupit të Sali Berishës janë shtuar edhe më shumë, pasi besnikët e ish-kryeministrit kanë ngritur një frymë përçarje mes tyre. E gjithë përplasja ka filluar pasi dy deputetët e Partisë Demokratike, Flamur Noka dhe Albana Vokshi kanë larguar emrat e eksponentëve nëpër rrethet dhe kanë vënë njerëzit e tyre.
Gjithashtu demokratët janë zëvendësuar me militantë të Lëvizjes Socialiste për Integrim. Berisha doli hapur që me emrat që zgjodhi në Kuvend për në Këshillin Kombëtar.
Pjesa dërrmuese e tyre ishin njerëz shumë të ngushtë të Berishës, duke filluar që nga familja. Dhëndri Jamarbër Malltezi u zgjodh anëtar i Këshillit Kombëtar. Emër tjetër është Floriana Garo, zëdhënësja e Berishës. Po ashtu u zgjodh Keltis Kruja, bashkëshorti i ish-zëdhënëses së Berishës, Erla Mëhilli etj.
Pakënaqësitë që krijoi ish-kryeministri pas këtyre lëvizjeve i shtoi edhe më shumë tensionet në “Foltore”
Ja si po zëvendësohen demokratët me militantë të LSI-së
Sherret e forta brenda selisë blu kanë ardhur si pasojë e goditjeve të njëpasnjëshme që kanë marrë nga demokratët e vërtetë të partisë.
Marrja e Partisë Demokratike me dhunë nga “Foltorja” ka bërë që shumë demokratë të largohen nga partia. Disa me forcë nga foltoristët, ndërsa disa të tjerë u larguan në momentin kur Berisha u braktis nga 2/3 e grupit parlamentar të PD, i braktisur totalisht gjithashtu nga Perëndimi.
Por momenti kulminant u shënua kur ish-kryeministri dha sinjale bashkimi me Lëvizjen Socialiste për Integrim, kur Ilir Meta të përfundojë mandatin si President në Korrik. Pra Berisha do t’ia “dhurojë” partinë Metës duke ia përgatitur terrenin që tani. Lëvizjet e fundit tregojnë se Sali Berisha e ka shndërruar partinë në një bunker antiamerikan për interesin e tij.
Besnikët e tij, Flamur Noka dhe Albana Vokshi kanë larguar emrat e eksponentëve në për rrethet dhe kanë vënë njerëzit e tyre, duke zëvendësuar dhe demokratët me militantë të LSI. Shembulli konkret ishin zgjedhjet në Berat, ku u vendos kryetar i degës Santiliano Dule, i cili në zgjedhjet e 25 prillit, ka qenë pjesë e fushatës së kandidatit të Lëvizjes Socialiste për Integrim.
Demokratët refuzuan farsën e zgjedhjeve të Sali Berishës. Ata u shprehën se ato jo vetëm janë përjashtuese po në vend të tyre u zgjodhën në poste drejtuese ish-funksionarë të Lëvizjes Socialiste për Integrim.
Pra kjo tregon se Sali Berisha ka injoruar kontributin e gjithë demokratëve të Beratit, që kanë punuar e sakrifikuar për Partinë Demokratike dhe u ka emëruar kryetar grupseksioni në Berat nga Lëvizja Socialiste për Integrim. Kjo është mënyra se si po veprohet kudo, përjashtuese dhe jo-përbashkuese.
