Blendi Fevziu ka bërë të ditur se shteti shqiptar nuk ka paguar asgjë për mjekimin dhe kurimin e ish-presidentit të ndjerë Bujar Nishani, i cili ndërroi jetë pak ditë më parë në moshën 56 vjeçare në një spital të Gjermanisë.
Fevziu vuri në dukje se shtetit shqiptar i takonte për arsye dinjiteti dhe për respektin që duhet të tregonte ndaj personalitetit të një figure politike si Bujar Nishani.
“Me aq sa unë kam informacion dhe besoj që nuk jam i gabuar: Shteti shqiptar nuk ka paguar asgjë për mjekimin e Bujar Nishanit. Një mjekim që duhet të ketë pasur shuma të mëdha, unë nuk mund të flas për atë, por që shtetit shqiptar i takonte për arsye dinjiteti dhe për një raport respekti ndaj personalitetit të tij sepse ne nuk kemi pasur shumë me gjithë historinë e Shqipërisë, ne kemi pasur 9 presidentë duke futur këtu edhe Ahmet Zogun.
Shteti shqiptar, mesa di unë nuk ka paguar asgjë për mjekimin e tij. Do të ishte në dinjitetin e shtetit që personalitete të tilla të larta të kenë të përfshirë edhe mjekimin. Shteti shqiptar ka paguar për mjekimin e shumë personazheve dhe ka bërë shumë mirë, kushdo që ka nevojë, shteti mund të ia paguajë, nëse mundet të ia paguajë.
Në këtë rast, do të ishte në nderin e shtetit që të kishte paguar edhe faturat e mjekimit të pafat në një farë mënyre të Bujar Nishanit”, është shprehur Fevziu.
