Italia po vlerëson masat për të ulur taksat për punëtorët me të ardhura të ulëta dhe të mesme dhe për të ndihmuar familjet dhe firmat të përballen me çmimin në rritje të energjisë elektrike, që është përkeqësuar si pasojë e luftës në Ukrainë.
Paketa do të ketë një fond prej më shumë se 30 miliard eurosh të mbledhura që nga janari për të zbutur ndikimin e çmimeve të larta të energjisë elektrike, gazit dhe benzinës, të cilat po rëndojnë në perspektivat e rritjes së ekonomisë së tretë më të madhe të zonës euro.
Qeveria synon të zvogëlojë diferencën midis pagës që paguan një punëdhënës dhe asaj që një punëtor merr në shtëpi, me përfitimet që shkojnë për punonjësit dhe jo për kompanitë.
Organizata për Bashkëpunim Ekonomik dhe Zhvillim vlerësoi se në vitin 2021 një punëtor – i pamartuar – në Itali, humbi 46.5% të pagës së tij bruto në taksa dhe kontribute sociale, raporti i pestë më i lartë nga një grup prej 38 kombesh të përparuara.
Masat që po diskutohen në frontin e energjisë kapin vlerën deri në 7 miliardë euro, thanë zyrtarë të qeverisë italiane, duke kërkuar të qëndrojnë anonimë për shkak të ndjeshmërisë së çështjes.
Qeveria italiane po mendon të zgjasë deri në shtator një ulje prej 25 cent të cmimit për një litër karburant, e cila do të skadonte më 8 korrik.
Roma mund të zgjasë gjithashtu në tremujorin e tretë dhe në disa raste deri në dhjetor, lehtësimet ekzistuese tatimore dhe bonuset që synojnë uljen e faturave për karburantin për ndërmarrjet me energji intensive dhe familjet e varfra.
Kryeministri italian Mario Draghi dëshiron të shmangë financimin e paketës përmes huamarrjes shtesë, thanë zyrtarët, në një kohë që Banka Qendrore Europiane përgatitet t’i japë fund një programi të blerjes së bonove që mbajti të ulëta kostot e huamarrjes italiane.
Për të ndihmuar në financimin e masave, Roma mund të forcojë një taksë prej 25% për prodhuesit dhe shitësit e energjisë elektrike, gazit natyror dhe produkteve të naftës, nga të cilët ministria italiane e financave u shpreh se do të sigurojë të ardhura aktualisht me vlerë pothuajse 11 miliardë euro.
Një burim nga qeveria tha se norma e taksës mund të rritet në 30%, duke siguruar potencialisht 2 miliardë euro burime shtesë.
