Shqipëria humbi një tjetër miqësore sot, teksa u vu menjëherë në rrezik pozicioni i trajnerit Kristian Panuci. Opinioni është i ndezur dhe nuk e pranon më një trajner që në tetë takime ka pesë humbje, një barazim e dy fitore, prej të cilave një me Lihtenshtejnin.
Por, pavarësisht të gjithave, duket se Panuci e ka lidhur mirë “kalin”, përderisa menjëherë pas ndeshjes, presidenti Duka ka nxituar t’i japë atij besimin e vet, pra ta konfirmojë si trajner të përfaqësueses, pavarësisht rezultateve të dobëta.
“Duhet t’i japim kohë Panuçit dhe skuadrës. Trajneri ka përgjegjësitë e tij, por nuk mund t’i adresohen të gjitha përgjegjësitë atij”, ishin fjalët e Dukës për “Panorama Sport”, qartësisht duke kaluar në pjesë të madhe të fajit te lojtarët. Por sa i sinqertë ka qenë Duka në deklaratat e tij? Kjo mbetet të shihet në ditët në vijim
Gjithsesi, duket e çuditshme që Duka kërkon kohë, pasi Panuçi kishte një vit kohë për të përgatitur ekipin për Ligën e Kombeve dhe do të luajë ndeshjen e parë në shtator pa ia pasur idenë se kush ishte ekipi titullar dhe me cilën skemë do të luajnë kuqezinjtë që kanë humbur plotësisht identitetin. Ndoshta ai do të ketë më shumë qetësi deri në shtator, pasi skuadrës ende i mungojnë shumë lojtarë cilësorë, si Abrashi, Memushaj, Grezda, Xhaka e Sadiku.
