Ndërkombëtarët kanë zbuluar në një raport disa nga shtetet ku pushtetarët shqiptarë kanë fshehur para. Sipas tyre ato janë, Meksika, Britania e Madhe, Namibia, Nigeria dhe Saint Lucia.
Ajo që bie në sy në raportimet e shteteve të tjera është se si destinacion po shihen dhe shtetet afrikane. Dy vendet më të përdorura janë Namibia dhe Nigeria. Sa i takon kësaj të fundit, arsyeja kryesore është sundimi i dobët i ligjit. Një tjetër destinacion është dhe ishulli Sant Lucia, i cili ndodhet në Amerikën Jugore, ku po ashtu thuhet se ka pasur transferta nga Shqipëria.
Vendi ku dominon fshehja e pasurive nga pushtetarët dhe kriminelët shqiptarë është Britania e Madhe. Por një fakt tjetër është se përdoret dhe për pastrim parash. Në raportin e nxjerrë për këtë vend, jepen dhe shembuj se si bëhet pastrimi i parave. Në një rast autoritet londineze kanë treguar dhe përfshirjen e bandave dhe trafikantëve të drogës. “Një bandë shqiptare trafikantësh që operonte në Londër, përdorte disa lloje agjencish konvertimi për të kthyer sterlinat në prerje të mëdha euro.
Kartëmonedhat euro më pas fshiheshin në automjete dhe dërgoheshin në vendin e tyre. Ata kishin krijuar lidhje me dy vëllezër shqiptarë që zotëronin internet kafe në Londër, të cilët kishin hapur kioska konvertimi parash në dyqanet e tyre dhe njerëz që vepronin për llogari të tyre. Kur pronarët shihnin se identifikoheshin nga autoritetet, ambientet mbylleshin me shpejtësi dhe biznesi çregjistrohej.
Pak kohë më parë agjencitë evidentuan nevojën e grupeve kriminale për të dërguar para jashtë vendit, me qëllim pagimin e furnitorëve. Ky rrezik mbetet i lartë. Paratë CASH zakonisht transportohen jashtë Britanisë me mjete të rënda, në mjete pasagjerësh apo udhëtime ajrore të linjave komerciale. FATF tregon një rast kur janë kapur mbi 1 milion stërlina, disa prej të cilave të destinuara për në Shqipëri.
