Kryeministri Edi Rama iu ka premtuar bluzave të bardha se rroga e tyre do të rritet me 100% deri në përfundim të këtij mandati krahasuar me shumën që merrnin para qeverisjes së PS.
Këtë deklaratë kreu i qeverisë e bëri në pritjen e organizuar me rastin e festave të fundvitit për mjekët dhe infermierët. Rama pranoi se në radhët e bluzave të bardha gjenden edhe njerëz të padenjë.
“Patjetër që nuk mungojnë ato rastet kur edhe në bluzat e bardha gjenden individë të padenjë por këto nuk janë rregulli por përjashtime që e përforcojnë rregullin që është se në sistemin tonë shëndëtetësor, në rradhë të parë i gjithë volumi i burimit të shërimit të sëmundjeve, është meritë e mjekëve dhe e gjithë trupës që i vihet në dispozicion 24 orë të gjithë njerëzve që kanë nevojë për këtë mbështetje.
Ne jemi përpjekur që këtë respekt ta shprehim duke rritur cilësinë e kushteve në të cilat ju punoni. Sot të paktën në sytë e mi, këto kushte janë shumë më të mira se më parë, me aparatura dhe mjete gjithmonë e më cilësore dhe nga ana tjetër për të rritur edhe shpërblimin tuaj.
Ne e dimë shumë mirë se pavarësisht se pagat janë rritur me 70% në raport me pikënisjen, nuk mjafton dhe duhet të bëjmë sërish rritje që të paktën brenda këtij mandati pagat t’i kemi rritur 100%. Të jeni të sigurt që këtë do ta bëjmë sepse ju meritoni edhe më shumë se kaq” – tha Rama.
Pavarësisht largimi nga vendi të bluzave të bardha, Rama tha se vetëm brenda këtij viti ishin punësuar rreth 900 infemierë dhe 335 mjekë në spitalet publike të vendit dhe se prirja për të punësuar profesionistët e rinj do të vazhdonte.
“Pavarësisht një prirje që është edhe mes bluzave tona të bardha siç është në shumë vende të jugut të Europës për t’u larguar, kemi pasur mundësinë të punësojmë rreth 5 mijë infermerë në spitalet tona. Janë mbi 900 vetëm këtë vit, të punësuar të rinj në sistem, ashtu sikundër janë 1320 mjekët e punësuar në këtë periudhë dhe 335 gjatë këtij viti”- u shpreh kryeministri.
