Qeveria ka gati ligjin për mundësinë e vijimit të punës, pas daljes në pension. Ndryshimet ligjore që pritet të kalojnë në kuvend parashikojnë që kjo kategori pensionistësh, nuk do të paguajnë kontribute shoqërore, por vetëm tatimin mbi fitim.
Drafti u hartua me kërkesë të qytetarëve në Këshillimin Kombëtar. Personat që kanë fituar statusin e pensionistit, por kanë dëshirë të vijojë punën, do të mund ta bëjnë një gjë të tillë, madje duke mos paguar as kontribute. Burime nga Ministria e Financave bënë të ditur se drafti me ndryshimet ligjore, që synojnë motivimin e kësaj shtrese të popullsisë për të vijuar punën, por pa pasur koston e kontributeve shoqërore është gati.
Drafti është dërguar për konsultim në ministrinë e Shëndetësisë, Drejtësisë, dhe drejtorisë së tatimeve, institucione që pritet të japin mendimin e tyre mbi ndryshimet e propozuara. Burimet saktësojnë se ndryshimet lidhen me dy momente, njohjen e statusit të pensionistit dhe paralelisht njohjen e vijimit të angazhimit në punë përmes një kontrate punësimi.
Në këtë moment qytetarit i lind e drejta për të vijuar angazhimin në punë, por pa paguar kontributet, ç’ ka do të thotë se pagës bruto nuk do ti zbriten më kontributet shoqërore. Për shembull, në rast se një qytetar paguhet me pagën bruto 60 000 lekë, 15 000 lekë i paguan kontribute shoqërore, 5 000 lekë tatim mbi të ardhurat, duke marrë pagë neto në bankë 40 000 lekë.
Pas hyrjes në fuqi të ligjit, ai që ka mbushur moshën e pensionit dhe do që të vijojë punën, nga paga bruto do ti zbritet vetëm tatimi mbi fitimin, dhe nuk do i zbritet vlera e kontributeve. Diskutimi mes specialistëve ka prekur dhe pjesën e vjetërsisë në punë.
Skenari i parë është që kjo periudhë pune të mos njihet si vjetërsi pune, duke pasur parasysh se qytetari do të përfitojë të ardhura shtesë nga mos pagesa e kontributeve shoqërore. Skenari i dytë, është që kjo periudhë të njihet si vjetërsi pune, duke i rritur dhe nivelin e pensionit përfituesit.
