Në Britaninë e Madhe vendasit nuk duan të punojnë si veterinerë e kasapë dhe bizneset tani po kërkojnë shqiptarë për këto punë.
Jason Aldiss, sipërmarrës nga Mbretëria e Bashkuar, njëherazi përfaqësues i Mjekëve Veterinerë në Europë prej tre ditësh ndodhet në Tiranë. Gjatë një interviste televizive ai ka treguar se Britania vuan për punëtorë në sektorë të ndryshëm të ekonomisë dhe veterinerët dhe kasapët janë ndër më të kërkuarit.
Që kur Britania e Madhe u largua nga Bashkimi Europian, pra Brexit, ne po vuajmë shumë për burime njerëzore. Janë mijëra vende boshe pune në sektorin agro-ushqimor dhe qindra të tjera në atë veterinar dhe përpunimin e mishit. Duke përfituar nga fakti që kam qenë edhe më herët në Shqipëri, po përpiqem që me atë të njohjeve të gjej sa më shumë veterinerë dhe kasapë.
Në lidhje me komentet diskriminuese ndaj shqiptarëve që mbërrijnë në ishull me gomone e mënyra të tjera ilegale, ai ka një këshillë për qeverinë e vendit të tij.
Për aq kohë që unë jam i bindur se Mbretëria e Bashkuar po vuan dëshpërimisht për punonjës, njerëz që ne na nevojitet gjithandej e veçanërisht në sektorin agro-ushqimor, mendoj se në vend të deklaratave gati raciste të kemi hapje të portave për të mirëpritur shqiptarët që duan të punojnë. Besoj absolutisht që ju keni burimet njerëzore të kualifikuara që ne na nevojiten në Mbretërinë e Bashkuar.
Aldiss thotë se ky proces mund të realizohet me eliminimin e burokracive në procedurat ligjore.
Burokracitë nuk mund të mungojnë, veçanërisht në drejtim të procedurave ligjore për rekrutimin e punonjësve të huaj. Por mund ta them i bindur që Home Office në mbretërinë e Bashkuar në vend të lehtësive ofron pengesa.
