Seancat e pazakonta të zhvilluara në Kuvendin e Shqipërisë ditët e fundit, kanë sjellë tensione mes palëve politike në Shqipëri, duke shkaktuar edhe përjashtimin e 12 deputetëve të opozitës për shkak të shkelje të etikës në Parlament.
Lidhur me këto zhvillime ka folur deputetja e Partisë së Lirisë, Monika Kryemadhi. Arsyeja për mungesa e ngjalljes së shpresës nga opozita, ishte pyetje e drejtuar ndaj Kryemadhit, e cila në një studio televizive theksoi se shkak për këtë janë edhe presionet psikologjike të ushtruara ndaj qytetarëve të cilët takohen me përfaqësues të opozitës. “Është opozita e keqja e këtij vendi.
Por nuk është opozita më e keqja e këtij vendi. Unë po ndjek këmbë këmbës Belind Këlliçin në fushatë. E dini ju se Këlliçi është bllok edhe në të gjitha televizionet e opozitës? Ka të bëjë me dhunën psikologjike të ushtruar tek qytetaria. Në momentin që mua më shikon me pronarin e lokalit, ta dish që nesër i shkojnë tatimet, task-forcat dhe ua mbyllin bizneset.
Kanë arritur deri aty ku u thonë maturantëve se do u rrisin mesataren nëse votojnë Erion Veliaj”, deklaroi ajo. Duke përmendur edhe protestën e qytetarëve për neglizhimin e vdekjes së 22 vjeçares keniane, e cila u dhunua në Tiranë, Kryemadhi theksoi se kur opozita organizon protesta të tilla për të nxitur hetimet, kishte reagime edhe të ndërkombëtarëve të cilët kërkonin të mos i bëhej presion drejtësisë.
Më tej ajo zbuloi se nuk ia ka dhënë Arben Ahmetaj dosjen për inceneratorët, por një njeri tjetër shumë më i afërt me Ramën. “Sa më shumë ta mbroj unë Ahmetajn aq më shumë do ta groposë Edi Rama.
Do t’i nxjerrë edhe një pastruese tjetër me lekë. Arben Ahmetaj në Elbasan dhe Fier ka zero përgjegjësi. Nuk ma ka dhënë Arben Ahmetaj dosjen. Nuk i ka shitur Arben Ahmetaj por një njeri tjetër shumë i afërt i tyre. E ka shumë afër atë njeriun”, deklaroi Kryemadhi.
