Është shtyrë për të disatën herë seanca për deputetin e Partisë Demokratike Ervin Salianji në Gjykatën e Apelit, për çështjen “Babale”. Vetë deputeti ishte i pranishëm në seancë, ku kërkoi përjashtimin e gjyqtares relatore. Ai tha se çështja është e montuar politikisht.
Elona Mihali do të jetë gjyqtarja që do të shqyrtojë kërkesën e deputetit të PD- së Ervin Salianji për përjashtimin nga trupa gjykuese, të relatores së dosjes “Babale”. Pas dorëzimit të kërkesave në seancë është hedhur shorti elektronik dhe pritet që gjytarja Mihali të marrë një vendim për përjashtimin ose jo të gjyqtares Edlira Petri nga shqyrtimi i çështjes.
Gjatë paraqitjes së kërkesës, deputeti Salianji theksoi se Petri është në konflikt interesi pasi bashkëshorti i saj Sokol Sadushi ka shqyrtuar një rekurs në Gjykatën e Lartë, të bërë nga të pandehurit me deputetin. Po ashtu ai vendosi në pikëpyetje paanshmërinë e gjyqtares në këtë proces.
Deputeti kërkon përjashtimin e gjyqtares: Janë dhënë para për të sjellë dëshmitarë të rremë
Kërkesë për përjashtim ka bërë edhe Indrit Sefa, avokati i gazetarit Jetmir Olldashi duke sqaruar se në portalin që ai drejton ka bërë disa shkrime kundër gjyqtares dhe bashkëshorti të saj. Gjykata e ndërpreu seancën me argumentin që duhet të vendoset për kërkesat e palëve. Pas daljes nga Gjykata deputeti Ervin Salianj theksoi se procesi është i montuar politikisht.
Ervin Salianji është dënuar në shkallë të parë më 1 vit burg për veprën penale të kallëzimit të rremë. Dosja “Babale” trazoi politikën gjatë vitit 2018 dhe shkaktoi tensione pasi PD publikoi një audio-regjistrim në të cilin thuhet se Geron Xhafaj, vëllai i ish-ministrit Fatmir Xhafaj fliste me persona që merreshin me trafikimin e lëndëve narkotike nga Shqipëria në drejtim të Italisë.
