Imzot Paul Richard Gallagher sekretar i shtetit të Vatikanit për marrëdhëniet me Shtetet dhe Organizmat Ndërkombëtarë dhe Ministri i Jashtëm i Vatikanit vizitoi qytetin e vogël të Mirditës ku u prit nga shumë qytetarë.
Pas takimit me ipeshkvin e Rrëshenit Dom Gjergj Meta, përfaqësuesi i rëndësishëm i Vatikanit u u vlerësua në mënyrë simbolike duke i dhuruar stemën e qytetit nga Kryebashkiaku Ndrec Dedaj.
Në fjalën e tij para shumë qytetarëve dhe besimtarëve Imzot Paul Richard Gallaghe tha se në jetë duhet të na udhëheqë mirësia dhe dashuria mes njëri tjetrit.
Ipeshkvi i Rrëshenit Dom Gjergj Meta, përcolli mesazhin e tij në këtë ditë të cilën e cilësoi si një ditë historike për Mirditën.
Sot në orën 16.00, gjithnjë në ambientet e selisë dioqezane të Rrëshenit Imzot Paul Gallagher u takua zyrtarisht me ipeshkvijtë e Kishës katolike të Shqipërisë. Në mbrëmje kthimi në Tiranë.
Në kryeqytetin e Shqipërisë vizita e Sekretarit të Vatikanit për Marrëdhëniet me Shtetet dhe Organizatat Ndërkombëtare, Imzot Gallagher nesër, më 20 mars, në orën 9.00, ka në porgram vizitën në selinë e Komunitetit Mysliman të Shqipërisë, takimin me krerët fetarë të vendit e, më pas, do të shkojë në Kuvendin e Republikës së Shqipërisë për t’u takuar, në orën 11.00, me kryetaren e tij, Lindita Nikolla.
Gjithashtu të hënën më 20 mars, nga ora 11.40 deri në orën 12.30, imzot Gallagher do të vizitojë Universitetin Katolik të Zojës së Këshillit të Mirë, ku do të paraqitet edhe rektori i ri Leonardo Palumbi nga Bashkësia e Shën Egjidit. Pasdite, në orën 16.00, vizita në Kishën Katedrale katolike, në atë ortodokse dhe në Xhaminë e qendrës së kryeqytetit shqiptar. Imzot Gallagher kthehet në Vatikan, të martën paradite, 21 mars.
Vizita e një personaliteti kaq të lartë të Selisë së Shenjtë në Shqipëri, është rast i jashtëzakonshëm jo vetëm për të vënë në dukje marrëdhëniet e shkëlqyera e historike të Shqipërisë me Selinë e Shenjtë, por edhe çast i lum për të prekur nga afër kujdesin atëror të Papës Françesku për Kishën dhe popullin Shqiptar.
