Mbrëmë u luajtën ndeshjet e para çerekfinale të Ligës së Kampioneve për sezonin aktual, ku padyshim kryendeshja e mbrëmjes ishte ajo e luajtur në Angli midis Mançester Sitit dhe Bajernit të Mynihut.
Skuadra bavareze pritej të tregonte vlera të mëdha në këtë takim dhe faktikisht kjo skuadër e ka potencialin për të bërë gjëra të mëdha. Por Siti ishte dje skuadër pragmatike. Edhe pse dominimin në fushë e mbante Bajerni, Siti tregoi saktësi në pasimin e fundit dhe në finalizim.
Kështu, Rodri shënoi në minutën e 27-të pas asistimit të Bernardo Silvës. ky gol i dha Sitit përparësi të mëdha në ndeshje, sepse mundi të kontrollonte më lehtë mesfushën. Pjesa e parë mbyllet 1-0. Në pjesën e dytë gjermanët e rritën disi fuqinë e sulmit. Por skuadra e Pep Guardiolës diti të menaxhojë mirë lojën mbrojtëse, duke u bërë ballë sulmeve të gjermanëve. Në minutën e 70-të Mançester Siti gjen golin e dytë.
Ishte Haland që dha pasimin e fundit për B.Silvën i cili me një gjuajtje të saktë në këndin e portës shënon golin e dytë. Kjo rrjetë e ngriti lart moralin e Sitit, ndërsa Bajerni i gjendur në disavantazh të dy golave i duhej të menaxhonte më mirë nervat e veta në fundin e takimit. Por dalja para në sulm e penalizoi Bajernin, ku norvegjezi Erling Haland e ndëshkoi në minutën e 77-të pasi shënoi golin e tretë për anglezët. Ndeshja e kthimit do të jetë e hapur, teorikisht, por me fitoren e djeshme Siti ka hedhur një hap përpara drejt gjysmëfinales, sepse është një rezultat që në këto nivele është gati e pamundur të përmbyset.
Ndërkohë, ndeshja tjetër çerekfinale e Champions League e luajtur mbrëmë ishte ajo mes Benfikës dhe Interit, luajtur në Portugali. Benfika kishte surprizuar me ardhjen deri këtu, por shorti që në fillim u pa me avantazh nga italianët, të cilët, të dështuar në kampionat deri tani, u duhej të bënin gjënë e duhur në Ligën e Kampioneve të Europës.
Pjesa e parë mbyllet në barazim 0-0, por në pjesën e dytë Interi e dominoi ndeshjen falë finesës në veprimet sulmuese, duke u treguar racional në finalizim. Në minutën e 51-të Barela shënoi pas pasimit të Bastonit. Ky gol bëri që portugezët të hidhen në sulm e Interi të tërhiqet, por mjaftueshëm për të qenë i rrezikshëm në kundërsulm. Për pasojë, në minutën e 82-të Lukaku shënoi golin e dytë për ekipin italian.
Kjo fitore e bën Interin favorit absolute për të shkuar në gjysmëfinale, ku do të gjejë fituesin e çifitit tjetër italian, Milan-Napoli, një duel që do të luhet sot në mbrëmje. Dueli tjetër i Champions mbrëmjen e sotme do të jetë Real Madrid-Çelsi. Të dy takimet nisin në orën 21:00.
