I pyetur nëse do të dëshironte të vlerësohen sipas meritave personale dhe të mos jenë bashkë me Maqedoninë e Veriut në rrugëtimin drejt BE-së, ose të shkojnë bashkë si pako, Kryeministri Rama, siç përcjell KlanM, ka kujtuar kohën kur ndarja nuk ishte opsion, për shkak se vendoste Këshilli Evropian dhe jo Shqipëria. Sipas Ramës, kjo situatë e kishte bërë shqetësuese situatën dhe kishte vështirësuar pozitat e Shqipërisë.
“Sot mendoj se rrugët tona në mënyrë natyrore u ndanë. Për shkak se në momentin kur një vend nis negociatat aderuese, rruga e tij varet nga meritat, jo nga politika dhe gjeopolitika. Të paktën kështu është në letër. Megjithatë, e dimë se ndonjëherë, ajo çfarë shkruhet në letër nuk ndodh në realitet. Por, nuk shoh më arsye të jemi bashkë. Secili ka rrugën e vet”.
BE-ja në Mars të vitit 2020 vendosi që Maqedonia e Veriut t’i nisë negociatat, por kjo u bllokua nga Bullgaria. Çështja u tejkalua me propozimin francez, pas çka u mbajt Konferenca e Parë Ndërqeveritare.
Që të nisin negociatat dhe të hapen klasterët, Maqedonia e Veriut, fillimisht duhet të bëjë ndryshimin e Kushtetutës, respektivisht bullgarët të futen në preambulën e Kushtetutës, për të cilën nevojiten 2/3 e votave në Kuvend.
