Sali Berisha po përpiqet ta justifikojë humbjen e thellë në zgjedhjet lokale, ku arriti të marrë vetëm shtatë bashki, duke deklaruar se zgjedhjet u vodhën dhe manipuluan, por pa nxjerrë prova.
Berisha gjithashtu ka shpërthyer në sharje dhe akuza ndaj gazetarëve dhe analistëve, kur ata kanë kërkuar prova për manipulimin e zgjedhjeve. Berisha i ka shpallur gazetarët të blerë, por pa thënë emra dhe pa përmendur studio konkrete.
Ylli Rakipi, drejtues i emisionit “Të Paekspozuarit”, emision ku ka patur disa debate për zgjedhjet lokale dhe janë kërkuar prova nga eksponentët e opozitës, për “vjedhjen masive” që ata pretendojnë, i ka kthyer një përgjigje Berishës në hyrje të emisionit.
“Po mirë mo Doktor i dashur, nuk e kupton që ne kemi gjithë këtë kohë që bërtasim me të gjithë fuqinë, që ditën që Amerika e madhe të shpalli ty non grata, kemi thënë ku i ke provat moj Amerikë e madhe kundër Doktorit?
Pse mo Doktor mbërrin në këtë gjendje? Studiot televizive ta paskan fajin ty? Pse mo Doktor i dashur rrëshket, apo kështu të duhet sot? Çfarë të kanë bërë studiot televizive? Pse nuk del të thuash që Tom Doshi që mund të ketë ndarë para vërtetë, i ka ndarë para filanit, filanit, këtij emisioni, atij emisioni, Edi Rama ka blerë këtë apo atë media?! Asnjëherë nuk e dëgjojmë se kë media konkretisht.
I pari ti shkon te mediat e superblera nga Edi Rama, ngrysesh dhe gdhihesh te këto media, përveç medias tënde sigurisht dhe me vështirësi të madhe vjen te media jonë, këtu, për të folur dhe për të dhënë përgjigje për pyetjet që të bëjmë. Ngrysesh dhe gdhihesh te mediat e blera dhe të stërblera të Edi Ramës, mëngjes, drekë, darkë.
Të të akuzojmë ne tani që të kanë paguar ata ty? Doktor, mblidh mendjen se ke marrë shtatë bashki, vetëm shtatë bashki dhe mos ulëri çdo ditë për studiot televizive se nuk t’i kanë marrë ato bashkitë. T’i ka marrë koka jote, që ka marrë erë, bashkë me partinë tënde që është copëtuar, është bërë copa-copa. Kjo është e vërteta”, tha Rakipi.
