Prokuroria e Posaçme është vënë në kërkim të videos origjinale me të cilën u fundos Safet Gjici. Ish-kreu i Bashkisë së Kukësit u kap në momente intime me një vajzë në zyrën e tij, ndërkohë që SPAK ka nisur hetimet nëse kemi të bëjmë apo jo me shfrytëzim të postit nga ana e tij.
Sipas informacioneve, SPAK është vënë në kërkim të videos origjinale. Nga verifikimet paraprake rezulton se materiali që u është shpërndarë gazetarëve nuk është i plotë dhe po ashtu nuk është origjinal. Nëse shihet me kujdes videoja, pamjet janë hapur në një kompjuter dhe është dikush që filmon ekranin me telefon.
Po ashtu në video është ndërhyrë, pasi është prerë pjesa ku nis videoja dhe po ashtu nuk ka audio nga momenti intim, por janë zhurmat që ka marrë celulari. Duke qenë se filmimi është bërë mbi ekranin e kompjuterit, nuk ka audion reale.
Prokuroria dyshon se regjistrimi është bërë nga një çantë dore dhe po kërkohet materiali burto. Aty dëgjohen dhe bisedat mes tyre, por po ashtu dyshohet se videoja është më e gjatë dhe në pjesën e parë ka një bisedë mes Gjicit dhe vajzës. Kjo bisedë do hedhë dritë nëse kemi të bëjmë me kërkim favoresh seksuale, shantazh apo një raport intim mes tyre. Hetimet po kryhen nga prokurorja Manjola Kajana.
