Këshilli i Lartë i Prokurorisë ka finalizuar skandalin me emërimin e familjarëve të deputetes Ermonela Felaj në Prokurorinë e Tiranës. Ndonëse në Kuvend kreu i KLP u përball me kritika dhe ju kërkuar sqarime sot mbi këtë çështje, “qeveria e prokurorisë” ka vendosur që Eranda Felaj të transferohet në prokurorinë e Tiranës.
Eranda Felaj është motra e deputetes së Partisë Socialiste, Ermonela Felaj dhe i bashkohet në këtë prokurori vëllait të saj, Armando Felaj, oficer i policisë gjyqësore, bashkëshortes së këtij të fundit, prokurores Alma Felaj si dhe kunatit të saj, Bledar Valikaj.
Në favor të transferimit votuan gjashtë prej anëtarëve të pranishëm: konkretisht zëvendëskryetari Tartar Bazaj; Bujar Sheshi; Esmeralda Cami; Eloida Goxhi; Arta Mandro dhe Ledina Riza. Kundër votuan anëtarët Sokol Stojani, Nurihan Seiti dhe Mirela Bogdani.
Ndërkohë, nuk ishin të pranishëm në mbledhje kryetari i KLP-së, Alfred Balla dhe anëtari Zeqir Hoda.
Skandali: Si u zhyt familja e Ermonela Felajt në Drejtësinë e re?
Padyshim, që nuk munguan debatet për shkak se 4 familjarë të deputetes bëhen pjesë të Prokurorisë së Tiranës, sikur nuk ka prokurorë në këtë vend përveç të afërmve të Felajt.
Anëtarja Nurihan Seiti kërkoi kujdes sa i takon emrit të zonjës Felaj. Ajo propozoi që rasti i saj të shtyhet dhe të merret kohë. Madje propozoi dhe një interpretim në Kushtetuese sa i takon ligjit.
Zëvendëskryetari Tartar Baze ndërhyri duke konstatuar se në Gjykatën Kushtetuese dërgohen për interpretim vetëm ato pjesë të legjislacionit që janë të paqarta. Ndërsa Mandro propozoi që të bëhet studim për të evidentuar nëse ka raste të ngjashme dhe se çfarë impakti kanë sjellë në funksionimin e prokurorisë.
Në vijim paraqiti mendimin e tij edhe anëtari Sokol Stojani. Sipas tij, një prej qëllimeve të reformës në drejtësi ishte edhe goditja e burokracive dhe situatave të tilla.
“Ne jemi vend i vogël dhe aty janë disa familjarë në një prokurori. As në diktaturë nuk është lejuar nepotizmi. Papajtueshmëria ambjentale është përcaktuar për të rritur besimin e publikut tek drejtësia. Kjo është lidhje nepotike. Të mos bëhemi qesharakë. Edhe në kohën e diktaturës situata të tilla u trajtuan dhe goditën nëpërmjet humorit, si në rastin e ‘Kunatit të shokut Xhemal’”, tha ai, raportoi “Birn”.
Por pavarësisht diskutimeve, në fund anëtarët votuan duke bërë që motra e deputetes të transferohet në Tiranë. Me pak fjalë reforma në drejtësi vetëm emrin ka, pasi me këto që po ndodhin gratë, vëllezërit dhe motrat e deputetëve po “pushtojnë” gjykatat e prokuroritë.
