Ministrja e Punëve të Jashtme, Donika Gërvalla, nëpërmjet një postimi në “Facebook”, ka përsëritur deklaratën e saj se Bashkimi Evropian pa Shtetet e Bashkuara dhe NATO-n është vetëm një “tigër prej letre”, ndërsa ka sfiduar të gjithë “specialistët” që e kritikuan për këtë.
Teksa ka rishpërndarë deklaratën e saj të mëparshme ku thuhet se Bashkimi Evropian “nuk është në gjendje dhe nuk ka kapacitet për ta garantuar sigurinë”, kryediplomatja kosovare ka sfiduar publikisht të gjithë ata që e kritikuan për deklaratën e bërë në kuadër të Forumit të Dubrovnikut.
“I sfidoj publikisht ‘specialistët’, që para se të mësyjnë me sulme personale dhe etiketime nga më absurdet, të na tregojnë saktë se cila nga shkronjat e citatit të mësipërm është e pasaktë apo e pavërtetë”, ka shkruar Gërvalla në llogarinë e saj.
“Si çdo politikan i përgjegjshëm, me fanatizëm dhe zë të lartë mbroj të vërtetën dhe interesin e vendit tim, dhe vetëm të vendit tim, kudo që më krijohet mundësia të flas, ashtu si edhe të tjerët mbrojnë interesin e vendeve apo organizatave që përfaqësojnë”, shkruan ajo.
“E sa për PDK-në, e cila tenton të na frikësojë që, nëse ajo vjen në pushtet, ne nuk paskemi më vend në Kosovë, mundem vetëm t’iu përkujtoj që nuk janë të parët që nuk dëshirojnë të më shohin as fizikisht në vendin tim”, ka shtuar ndër të tjera ajo.
Shefja e diplomacisë kosovare në Forumin e Dubrovnikut ku pjesëmarrës ishin edhe Emisari Special i BE-së për dialogun Kosovë-Serbi, Miroslav Lajçak dhe i dërguari i posaçëm i Shteteve të Bashkuara të Amerikës për Ballkanin Perëndimor, deklaroi se Evropa është një “tigër prej letre”.
“Unë mendoj që ajo nuk është në gjendje dhe nuk ka kapacitet për ta garantuar sigurinë. Arsyet janë të qarta: mungon vullneti politik, mospajtimet brenda BE-së janë të mëdha dhe sa i përket sigurisë, pa SHBA-në dhe NATO-n, BE-ja është një tigër prej letre. BE-ja e di këtë dhe prandaj vazhdimisht lëshon pe, i ikën konfrontimit”, tha ajo.
