Ish-kreu i Shërbimit Informativ Shtetëror, Fatos Klosi ka komentuar situatën politike në vend, duke e ndalur theksin tek zhvillimet e brendshme brenda Partisë Demokratike dhe rihapja e dosjes “Gërdeci”, apo vrasja e Azem Hajdarit, i cili u vra në Tiranë në 12 shtator të vitit 1998.
Gjatë një interviste për gazetën “SOT”, zoti Klosi u shpreh se ish-kryeministri Berisha është e keqja e Shqipërisë, ndërsa theksoi së askush nuk i shkon pas kreut të “Foltores” për protesta.
Nga ana tjetër, teksa sot u shënohen 25 vite nga vrasja e themeluesit të Partisë Demokratike, Azem Hajdarit, një prej personaliteteve më të rëndësishme të viteve të para të pluralizmit në Shqipëri, zoti Klosi deklaroi se askujt nuk i intereson zbardhja e kësaj ngjarje të rëndë, duke bërë përgjegjës Berishën për këtë krim.
Sipas tij, me vrasjen e Hajdarit Berisha përdori një skemë për t’i shpëtuar drejtësisë duke futur në lojë Fatos Nanon. Ndërkohë, zoti Klosi tregoi se pse Fatmir Mediu nuk e thirri Shkëlzen Berishën si dëshmitar në gjyqin e aferës së Gërdecit.
-Zoti Klosi, me dosjen e “Gërdecit” po merret personalisht vete kreu i SPAK, Altin Dumani, mendoni se do shkojnë ne burg fajtoret e vërtetë?
Problemi nuk është do shkojnë apo jo në burg, por problemi është që të dal e vërteta. Pse demontimi u bë atje dhe u sajua një ndërmarrje private, dhe pastaj u vranë njerëz të pafajshëm, gjërat janë të qarta, këto janë problemet kryesore, ashtu si është trajtuar si në procesin gjyqësor të mëparshëm që ishte një fatkeqësi teknologjike që mori flakë baruti, sigurisht që nëse është baruti sheshit do marr flakë. Unë do doja shumë që të marr rrugë ky problem, pastaj varet nga efektiviteti i hetimeve që po bënë prokuroria. Aty u morën në punë njerëz të pakualifikuar madje edhe të rinj për të bërë një punë shumë të rrezikshme ndërkohë që ajo punë kërkonte kualifikim.
-Pse ne listën që thirri premten ish-ministri i Mbrojtjes, Fatmir Mediu për dëshmitarë, nuk është emri i Shkëlzen Berishës?
Të gjithë ata që ndihen të akuzuar do bëjnë ç’është e mundur që të shpëtojnë. Prokuroria nëse do e çon deri në fund dhe i gjen të gjitha. Problemi është shumë i thjeshtë.
-Sot bëhen 25 vite nga vrasja e ish-deputetit Azem Hajdarit, a ka pasur gisht Sali Berisha në këtë ngjarje?
Po ta trajtosh problemin se kush ishte i interesuar për vrasjen e tij, ishte Sali Berisha, sepse Fatos Nano nuk ishte i interesuar për vrasjen e Azem Hajdarit sepse ishte kryetar i qeverisë. Azemi ishte një deputet dhe qeveria duhet të ishte përgjegjëse për të. Më kanë akuzuar mua për këtë vrasje që nuk kisha asnjë interes. Berisha sa herë ndodh diçka që s’është e mirë e gjen i pari kush e ka bërë dhe pse e ka bërë. Në atë kohë për të gjitha pikëpyetjet pas tyre ishte Nano nëse sot është Rama dhe sot kur del që flet ai thotë këtë e bëri Rama. Është bërë procesi gjyqësor janë caktuar fajtorët. Ca nuk ishin gjallë kur u bë gjyqi dhe u dhanë dënime të rënda. Nuk ka nga asnjë interes që ai proces të ritrajtohet.
-Po thirrjet e Berishës për protesta si te duken? A ka ai potencial për t’i vene zjarrin Shqipërisë dhe rrezoje qeverinë siç premton?
E vetmja gjë që ka Sali Berisha në dorë gjoja për të trembur qeverinë janë protestat. Ai nuk ka parti ka vetëm disa deputet që i binden, ai nuk ka asgjë në dore, madje edhe protestave u ka dal boja dhe s’kanë bërë asgjë deri tani, organizohet protesta, mbanë fjalim Berisha dhe ikin në shtëpi. Nuk ka më asnjë njeri besim tek protestat që organizon Berisha sepse asnjë nuk e beson se nëpërmjet atyre protestave do të rrëzohet qeveria. U bënë 30 vite që ne e njohim këtë sistem dhe e kemi parë se nuk bëhet asgjë me protesta nëse nuk ka mbështetje të të gjithë popullit. Berisha është i mbaruar nuk ka më se çfarë ti jap këtij populli. /Intervistoi: Sidorela Braçja
