Bashkë me trajnerin Silvinjo doli dje në konferencën për shtyp edhe kapiteni i kuqezinjve, Berat Gjimshiti, i cili rriti së tepërmi adrenalinën dhe përcolli mesazhe optimizmi tek tifozët, pasi shprehu ndjesinë se Kombëtarja do ta fitojë këtë ndeshje dhe natyrisht fitorja e afron përfundimisht me Europianin. Gjimshiti e tha qartë në prag të ndeshjes Shqipëri-Republikë Çeke, se duan që në këtë ndeshje të marrin fitore dhe të festojnë pas saj.
Megjithatë, mbrojtësi i Atalantës theksoi se duhet të jenë me këmbë në tokë, pasi përballë kanë një kundërshtar shumë të vështirë. “Momenti që prisnim prej tetë vitesh ka ardhur a je gati që të marrim fitore nesër? “Për momentin nuk e di, por në futboll duhet të fokusohesh ndeshje pas ndeshje. Momenti është shumë i bukur dhe i vështirë, por jemi gati për këtë ndeshje. Euforia është më shumë jashtë se brenda, ne i dimë vlerat e kundërshtarit dhe vlerat tona. Çdo ndeshje është e vështirë, por i dimë vlerat dhe cilësitë tona dhe besoj do të jemi gati për këtë ndeshje”, nënvizoi Gjimshiti.
Mungesa e Ismajlit, e rëndësishme
Në këtë ndeshje trajneri Silvinjo nuk do të ketë mbrojtësin Ardijan Ismajli që është i dëmtuar, por për kapitenin Gjimshiti, ekipi ka dhe mbrojtës të tjerë cilësorë që do ta mbulojnë si duhet detyrën e tyre. “Është një mungesë për të gjithë skuadrën, por kemi lojtarë që janë me vite në Kombëtare dhe besoj se s’ka për të qenë problem. Sidomos për mua, pasi u besoj të gjithë lojtarëve njësoj. Çekia është një skuadër shumë fizike, që luan shumë me krosime dhe goditje standarde. Besoj do jetë e njëjta ndeshje nesër, nuk ishte e lehtë të merrnim barazimin, por ia dolëm. Nesër ta shikojmë ishalla kemi më shumë raste dhe të shënojmë e fitojmë”, nënvizoi më tej Gjimshiti.
Kam ndjesi për fitore
Kapiteni kuqezi nuk e fshehu se është optimist për sukses, duke thënë se ka ndjesinë e fitore në këtë duel. Madje si ogur i mirë ishte rasti i 8 vjetëve më parë kur mbrojtësi i Atalantës i shënoi Armenisë në duelin e parafundit për tu kualifikuar në Europianin e vitit 2016. “E pashë sot në Instagram, por po shpresoj, le ta shohim. Më shumë rëndësi ka suksesi i Kombëtares, që të fitojë s’ka rëndësi kush shënon. Ndjesi për fitore? Them që po, nuk e di do e shohim në vazhdimësi, por kemi tre ndeshje të vështira, por do të jap maksimumin, por duhet ta marrim ekip prej ekipi ose ndeshje prej ndeshje. Festa në Preshevë? “Do vij edhe nëse ndodh e kundërta, pasi kam gjyshërit atje, vij me qejf atje se kam njerëzit e mi”, shtoi Gjimshiti.
Dueli me çekët vendimtar
Gjimshiti e pranoi se dueli me Çekinë është vendimtar për fatet e kualifikimit dhe pozitat e renditjes në grupin E. “Sigurisht që është një moment vendimtar dhe jo vetëm, nesër është një ndeshje vendimtare, por edhe të tjerat. Besoj se trajneri juaj do të flasë nesër pas ndeshjes se si ishte atmosfera në stadium. Shqiptarët dinë të bëjnë atmosferë dhe besoj se do të jetë në favorin tonë”, përfundoi Gjimshiti. Shqipëri-Republikë Çeke, sfidë e vlefshme për kualifikueset e EURO 2024 luhet këtë të enjte në “Air Albania” duke nisur nga ora 20:45
