Ish-sulmuesi Igli Tare, ishte prezent në tribunën VIP të “Air Albania”-s ku ndoqi duelin mes Shqipërisë dhe Çekisë, që përfundoi me shifrat 3-0 për kuqezinjtë. Në prononcimin e dhënë pas kësaj fitore spektakolare për mikrofonin e “TV KLAN”, Tare u shpreh:
TARE
“Ishte një ndeshje fantastike, e merituar nga skuadra jonë, komplimente stafi, trajnerët, sot meritojmë të gjithë bashkë të festojmë. Një natë e madhe. Po u thoja miqve në tribunë, që jemi skuadër më e mirë se Polonia dhe Çekia edhe individualisht. Sot kanë bërë gjithçka mirë.
Duke parë dhe mungesën e Brojës, që është lojtar i jashtëzakonshëm, kush u fut e demostroi se e meriton të jetë pjesë e kësaj skuadre. Trajneri ka dhimbje koke, duke pasur lojtarë me shumë kualitet. Ka ndërtuar një grup kompetitiv. Kanë mundësinë të bëjnë edhe çudira në Europian.
Po të isha akoma drejtor i Lacios, do e kisha marrë gjithë skuadrën.
Është trajner që sjell jo vetëm kualitet por edhe eksperiencë shumë të madhe për të menaxhuar situata të vështira. Ka shumë kualitet edhe skuadra. Kjo skuadër duhet të ketë besim të shkojë deri në fund, duke luftuar të gjithë bashkë mund të bëjmë mrekullira”, deklaroi Tare.
