Duke marrë parasysh që qëndrimet e kryetares së Komisionit Evropian, Ursula von der Leyen, kanë qenë të diskutueshme dhe radikale, në disa çështje të rëndësishme gjatë viteve të fundit, nuk është surprizë që 850 punonjës të Komisionit Evropian dhe institucioneve të tjera evropiane firmosën dhe i dërguan një letër aspak të këndshme gruas që duhet të përfaqësojë Bashkimin Evropian, të mbrojë interesat e anëtarëve të tij dhe të gjithë qytetarëve.
Sipas Euroactiv, punonjës të Komisionit dhe të institucioneve të tjera të BE-së ia dërguan letrën sepse, pas përshkallëzimit të konfliktit të ri në Lindjen e Mesme, ajo kryesisht ishte në anën e Izraelit, duke lënë pas dore marrëdhëniet me arabët, myslimanët. Letra është tre faqe dhe është dërguar në adresën e Von der Leyen, si dhe përfaqësuesve të ndryshëm të institucioneve të BE-së, më 20 tetor.
Punonjësit e KE-së dënojnë ashpër sulmin e Hamasit ndaj civilëve, por ata vlerësojnë se institucionet evropiane nuk duhet të lejojnë të qëndrojnë kryesisht me njërën palë, palën izraelite. Sipas tyre, Ursula von der Leyen ka qëndrime identike me ato të presidentit amerikan Joe Biden.
“BE rrezikon të humbasë besueshmërinë”, paralajmëron letra, ku shkruhet se BE duhet t’u bëjë thirrje të dyja palëve të ndalojnë sulmet dhe të mbrojnë civilët, në përputhje me vlerat humanitare evropiane dhe ndërkombëtare.
Në pjesën më të madhe të botës myslimane, përgjigja perëndimore ka tërhequr kritika ndaj hipokrizisë dhe standardeve të dyfishta për dështimin në dënimin e sulmeve ajrore izraelite ndaj civilëve në Gaza, për të cilën kritikët thanë se ishte e njëjta lloj dhune të Rusisë në Ukrainë, që Perëndimi e dënoi fort njëzëri.
