Analisti Frrok Çupi e ka konsideruar përplasjen fizike nga deputeti demokrat, Bledion Nallbati drejtuar deputetit socialist, Vullnet Sinaj, si një dhunë të përgatitur nga Sali Berisha.
Ai ka thënë se këto skena ishin të planifikuara të ndodhnin që para 10 ditësh. Sipas Çupit, duke shkaktuar trazira është e pamundur të shpëtohet Berisha nga krimi. “Kjo kuptohet nga të gjithë njerëzit që shikojnë se këtyre nuk u mbajnë më nervat. Janë shumë afër asaj që i pret, janë të lidhur shumë me krimin. Kanë një komandant i cili është i burgosur, por është në prag të dhënies së llogarive për gjithçka që ka ndodhur në Shqipëri. Këta që shkaktojnë tension dhe dhunë janë të parët që kanë përfituar prej tij dhe e dinë që kanë të njëjtën rrugë. Patjetër që i detyrohen Berishës, janë ushtarë shumë jo të bindur për shkak të krimeve që janë kryer.
Të gjithë këta kanë kryer krime korrupsioni dhe krime kundër njeriut. Sigurisht që janë kriminelë më të vegjël se sa Berisha, por janë në të njëjtën test. Sigurisht që nuk është një situatë për të cilën duhet të alarmohet shoqëria shqiptare për shkak se tashmë ata janë të përjashtuar. Por këto skena ne do t’i shohim edhe më vonë, për shkak se kjo gjë ishte përgatitur që para 10 ditësh si një alibi që priste burgosjen e Sali Berishës dhe këta i besojnë përrallën se duke shkaktuar trazira dhe luftë mund të shpëtojnë Berishën nga krimi.
Është e pamundur”. Çupi ka theksuar se Berisha e ka humbur të gjithë mbështetjen popullore prej shumë kohësh dhe pa u izoluar ai nuk ka qetësi vendi. “Ky e ka djegur disa herë, që nga viti 1991, si sallën Parlamentit, aq edhe vetë Shqipërinë. Tani po mbledh kockat për të dhënë llogari para Drejtësisë… Ka përdorur pushtetin e lartë për të vrarë njerëz me qëllim që të pasuronte familjen dhe veten, dhe pas kësaj pasurinë e grabitur vendit e ka përdorur për të mbajtur pushtetin.
Tani po kërkon ‘vrimë’ dmth., sallë Kuvendi ku të futet me qëllim që të mos i dorëzohet Drejtësisë. Nuk u vijnë para syve filmat me luftë, si atëherë edhe sot, kur ‘heroi’ mbetet i plagosur në ca rrëza?… Sali Berisha, luftëtari i paepur kundër interesave të vendit, tanimë është në fund.
‘A i vrarë, ku po shkon?’, do të thoshte labja. Miqtë e tij të aktit të grabitjes herë kthehen për të marrë në mbrojtje ‘heroin’, herë i largohen si ‘të ndershëm’. Të gjithë janë të plagosur nga Drejtësia e re kundër Krimit dhe Korrupsionit. Njëri ka kërcënuar shtetin për të dorëzuar pasurinë e shtetit te Albi, tjetri ka firmosur në dobi të Xenit, të gjithë së bashku kanë shërbyer si anëtarë të Organizatës Kriminale të lidhur me familjen Berisha”, tha dje Çupi.
