Interesi për vaksinën e gripit këtë vit ka qenë tejet i lartë nga grupet e riskut. Në vetëm një muaj 140 mijë qytetarë janë vaksinuar kundër gripit stinor në të gjithë vendin.
Në një intervistë televizive, drejtoresha e Institutit të Shëndetit Publik, Eugena Tomini thotë se vaksina e gripit dhe COVID duhet te aplikohen njëkohësisht.
“Kemi një ecuri shumë të mirë të kryerjes së vaksinave në çdo qendër shëndetësore. Pavarësisht se kemi hyrë në sezonin vjeshtë dimër vaksina mund të kryhet në çdo moment, dhe ndërkohë krijon një mbrojte shumë të mirë ku ne evitojmë format e rënda të sëmundjes, evitojmë vdekjet,” – u shpreh Tomini.
Në vendin tonë nuk është izoluar ende gripi, por vetëm koronavirusi.
“Jemi në muajin nëntor kemi një situatë epidemiologjike që ka përvijuar e qetë. Kemi një incidencë të qetë, kemi një numër rastesh të ulur që shkojnë rreth 170-220 raste të konfirmuara në javë. Jemi herët për të gjykuar për vazhdimin e vjeshtë dimrit më pas, pasi parashikohet bashkëqarkullim i virozave të tjera respiratore. S’kemi asnjë rast të konfirmuar me grip aktualisht në vend,” – u shpreh Tomini.
Ekspertët e Institutit të Shëndetit Publik parashikojnë që viti 2023 do të ofrojë të njëjtën panoramë epidemioligjike me vitin 2020, ku COVID do të mbizotërojë, ndaj edhe apelojnë që grupet në risk të vaksinohen.
