Pas Saimir Tahirit dhe Fatmir Xhafajt, në shënjestrën e opozitës do të jetë Taulant Balla. Partia Demokratike ka mbledhur dje grupin parlamentar dhe ka vendosur që edhe këtë javë të vijojë me të njëjtin skenar në komisionet parlamentare.
Kreu demokrat Lulzim Basha ka vendosur gjithashtu që sulmet e deputetëve të fokusohen më së shumti tek Taulant Balla, për ta akuzuar atë si të implikuar në kapjen e 3.4 milionëve euro në Portin e Durrësit dy ditë më parë.
Sipas informacioneve, Basha u ka kërkuar deputetëve që në çdo komision parlamentar apo dhe në çdo studio televizive ku do të ftohen, ata të mos i kursejnë akuzat ndaj Taulant Ballës.
Detaj që u pa edhe në mbledhjen e Komisionit Parlamentar të Shëndetësisë ku deputetët e Partisë Demokratike hodhën akuza të drejtpërdrejta ndaj Taulant Ballës. Sakaq, kreu demokrat i udhëzoi deputetët që të vijojnë me sulmet edhe sa i takon çështjes së ish-ministrit Saimir Tahiri si dhe ministrit të Brendshëm, Fatmir Xhafaj. Por krahas këtyre porosive Basha, u ka kërkuar deputetëve që të mos heqin dorë as nga çështja e teatrit.
Pas debatit që u zhvillua në Komisionin e Medias, javën e kaluar, kreu demokrat i ka porositur deputetët që të vijojnë me akuzat si dhe të kërkojnë llogari nga ministrja e Kulturës, Mirela Kumbaro. Ndërkaq, kreu i PD në mbledhjen e grupit u ndal edhe tek çështja e negociatave si dhe vendimi që do të jap Këshilli Europian më datë 28 qershor. Duke u shprehur i bindur se vendimi për Shqipërinë do të jetë negativ, Basha u premtoi deputetëve se qeverisë shumë shpejt do t’i vijë fundi./ Sot
