Ilir Meta dhe grupi i Gazment Bardhit i kanë dhënë dje një goditje të fortë ish-kryeministrit Sali Berisha. Ky i fundit që drejton Rithemelimin, organizoi dje një festë sa i takon 33 vjetorit të themelimit të Partisë Demokratike.
Por edhe pse pritej që në këtë event të ishin prezent grupi i Bardhit dhe Meta që pretendojnë se janë bashkë me Berishën pasi i bashkon e njëjta kauzë, pra rrëzimi i qeverisë, asnjëri nga ata nuk ka qenë prezent në gostinë e shtruar nga ish-kryeministri i shpallur “non-grata” nga Shtetet e Bashkuara të Amerikës dhe Britania e Madhe.
Kreu i Partisë së Lirisë, Ilir Meta një vit më parë ka qenë në krah të Berishës në 32 vjetorin e themelimit të PD, madje kanë trokitur gotat e shampanjës, ndërkohë që dje ai nuk është parë kërkund.
Meta prej disa ditësh është zhdukur nga qarkullimi dhe thuhet se “ka marrë malet”, pas zërave se Prokuroria e Posaçme (SPAK) i ka kopsitur dosjet, për shkak se po hetohet për aferën “CEZ-DIA” dhe dosjen e lobimeve në SHBA (pastrim parash).
Mirëpo teksa të gjithë prisnin që ai të dilte dje nga “strofulla”, duke bërë përjashtim pasi Berisha kishte gëzim, nuk ka ndodhur aspak kështu. Meta ka refuzuar ftesën e Berishës, duke braktisur aleatin e tij dhe pikën e dobët që siç është shprehur ka “doktor Berishën”. Po ashtu, Berishës i ka dhënë goditje edhe Gazment Bardhi, duke bërë që kryefoltoristit t’i mbetet vetëm vajza e tij, Argita dhe “Xhaketat e Vjetra” që i ka pasur bashkëpunëtorë në Partinë Demokratike e qeveri si Besnik Mustafaj, Arben Imami, Jozefina Topalli apo Neritan Ceka.
Duket se ky është një paralajmërim që Argita shumë shpejt do të bëhet pjesë e politikës edhe pse gjatë fjalës së tij në Kuvend, Berisha theksoi pak ditë më parë se Malltezi mbajti fjalim si shumë të tjerë aty, pasi sipas tij, ajo është një aktiviste e PD-së që në ditët e para të themelimit të kësaj force politike. Megjithatë fakti që Berisha ka përfunduar vetëm tek besnikët e tij, tregon se përveç ndërkombëtarëve që i kanë hequr vizën, ai po braktiset nga të gjithë edhe brenda vendit, pasi askush nuk i shkon pas, përveç familjarëve, ithtarëve të tij apo ata/ato që dyshohet se i kërcënon me dosje.
Berisha flet për rikthimin
Ndërkohë teksa fliste dje në eventin e organizuar për 33 vjetorin e themelimit të PD dhe për historinë e partisë më të madhe opozitare në vend ndër vite, ish-kryeministri Berisha nuk kurseu akuzat për Lulzim Bashën. Kreu i Rithemelimit theksoi se për Partinë Demokratike, vitet më të vështira kanë qenë 2013 (vit kur ai u largua nga politika pas humbjes së zgjedhjeve dhe viti 2021, kur ai u shpall ‘non-grata’ dhe iu kthye jetës aktive politike.
“PD është parti idealesh dhe pikërisht se ajo është e tillë, mbetet parti e një vitaliteti të jashtëzakonshëm. Kujtoni pak vitin 1997, se si u copëtuam. Por kujtoni vitet më pas se si u ngritëm jashtë çdo lloj parashikimi. U rikthyem dhe ndërmorëm reformat që përmenda.
Vitet më të rënda, më të vështira për ju demokratë kanë qenë vitet ‘13-‘21. Sot bisedoja me një bashkëpunëtor timin dhe më thotë se nuk e kuptoj, këta që takoj unë, demokratët na thonë se ne e mbështesnim Lulzim Bashën për shkak të Doktorit.
I them unë se kjo është absolutisht e vërtetë dhe të gjithë ata që thonë këtë, thonë të vërtetën. Nuk dua të ndalem, por drama që përjeton sot Shqipëria i ka rrënjët pikërisht nga shndërrimi i udhëheqjes së PD nga një udhëheqje e guximshme dhe idealiste në një udhëheqje pazaresh të turpshme. Pazaresh amorale. Dhe ajo po e çonte këtë forcë të mrekullueshme politike de facto drejt shuarjes së saj morale. Drejt transfigurimit të saj në një forcë që nuk duhej të ekzistonte. Ajo nuk mbrojti interesat e popullit opozitar, por nuk mbrojti interesin kombëtar”, deklaroi ai.
Kryefoltoristi mesazh të vetëve
Ndërkaq, ish-kryeministri Berisha e mbylli fjalimin e tij në festën e 33-vjetorit të Partisë Demokratike, duke u shprehur se nuk ka forcë, regjim, apo diktaturë që mund të rezistojë në betejën me mosbindje civile. Berisha shprehet i bindur për aksionin opozitar, teksa tha se tani që janë 33-vjeçarë, janë më moshën më të fuqishme për betejën pa kthim deri në fitore.
“Sot nuk ka forcë, nuk ka regjim, nuk ka diktaturë që mund të na rezistojë ne në betejën tonë me mosbindje civile pa kthim. Por sot, ne të gjithë demokratë dhe demokrate, kudo që jemi, jemi 33-vjeçarë, por betejën e fitojmë me 20-vjeçarët, me 22-vjeçarët, e fitojmë me të rinjtë shqiptarë.
Ata kanë ikur shumë, kanë ikur këto 10 vite qindra e mijëra nga Shqipëria, por prapë qindra e mijëra janë në Shqipëri. Nga t’ia nisim? Tek fëmijët tanë, kudo që janë, në ballë të kësaj beteje. Nga t’ia nisim? Tek fëmijët e popullit opozitar, në ballë të kësaj beteje.
Nga t’ia nisim? Te çdo i ri dhe e re e këtij vendi që beson në një Shqipëri europiane. Pra, beteja pa kthim që ka nisur në parlament është drita në fund të tunelit, që duhet të ndriçojë mendjen, zemrën, shpirtin e çdo demokrati dhe demokrateje. Duhet të bëjmë çdo gjë, t’i marrim me vete, t’i vendosim në piedestal të rinjtë e këtij vendi. Nuk ka forcë në botë që u reziston atyre. Ndaj dhe njëherë, duke u uruar gëzuar këtë 33-vjetorin, u bëj thirrje të jetë kjo një ditë betimi për ne dhe për çdo demokrat, betejë pa kthim deri në fitoren tonë”, nënvizoi Berisha.
