Avokati Idajet Beqiri komentoi vendimin e Prokurorisë së Tiranës e lidhur me çështjen e “21 janarit”, e cila kërkoi ndihmën e autoriteteve të huaja.
Sipas tij, Prokuroria e Tiranës po mban në duar një procedim që nuk i takon, ndërsa thekson se veprimet e Prokurorisë së Tiranës nuk kanë asnjë qëllim tjetër por vetëm të paralizojë punën e Gjykatës së Lartë.
“Prokuroria e Tiranës që e ka fshehur këtë krim për kaq vite, tani po mban në duar një procedim penal që nuk i takon ta mbajë. U bënë katër vite që kanë filluar hetimet dhe po i mbulon pluhuri.
Tani ose janë frikacakë ose duket se paratë e pista të familjes Berisha u kanë zënë grykën dhe nuk po ecin më tej.
Familja e Nikës i ka thënë SPAK se subjekt të këtij krimi është Sali Berisha ministri i Brendshëm Lulzim Basha dhe drejtori, Prendi. Në vend që të regjistronte procedimin penal, në shkurt të 2023 dërgoi ‘një pacavure’ do ta quaja unë”, ka thënë ai në një intervistë në “Tirana Live” në ABC.
Gjithashtu ai ka theksuar se çështja duhet t’i kalojë SPAK.
“Ministri i Brendshëm pasi ka bërë kallëzimin u tërhoq, por familjarët nuk i kanë mbyllur letrat. Kur është marrë vendimi i gjykatës së Strasburgut ia dërguam Gjykatës së Lartë. Tani më 27 shkurt gjykata e lartë do të shkurtojë çështjen. Tani dalja e prokurorisë që të thotë do të kërkojnë ekspertë të huaj, nuk ka aspak vlerë.
Këtu them unë që ka ardhur momenti që duhet bërë një kallëzim penal kundër Prokurorisë së Tiranës. Prokurori i Përgjithshëm duhet të distancohet. Ky është një krim shtetëror, është krim i provuar, ka një organizator, një frymëdhënës që ka emrin Sali Berisha.
Ministri i brendshëm nuk dihet çfarë roli ka luajtur dhe duhet të japë sqarime. Kjo punë duhet të mbyllet njëherë e mirë me ndëshkimin e autorëve të krimit”, përfundoi ai.
