Gjatë mbledhjes së sotme të Komitetit Parlamentar të Stabilizim Asocimit BE-Shqipëri u miratuan një paketë rekomandimesh për Shqipërinë.
Në të cilat, veç të tjerash, në amendamentin e 5-të, pika 9, flitet për çështjen e Reformës Zgjedhore dhe se si opozita duhet të bëhet pjesë për mbarëvajtjen e punëve në këtë komision dhe jo të bëhet pengesë, siç po mundohet të bëhet një pjesë e saj.
Në këtë amendament shprehet keqardhje për polarizimin e ashpër politik të jetës dhe të shoqërisë shqiptare, ashtu siç shprehet keqardhje që, “pavarësisht krijimit të komisionit ad hoc për reformën zgjedhore në shkurt të vitit 2022, nuk është bërë asnjë përparim, as në miratimin e ndonjë teksti, as në adresimin e rekomandimeve të pazgjidhura të OSB/ODHIR-it dhe Komisionit të Venecias”.
Siç shihet, Parlamenti Europian, pavarësisht zhurmës dhe kaosit, njeh komisonit ad-hoc të ngritur në vitin 2022, që ka si bashkëkryetar Enkelejd Alibeajn dhe në përbërje të tij ka të gjithë përfaqësitë e partive opozitare dhe të gjitha flukset e sotme brenda opozitës dhe PD, ashtu sikurse kërkohet në këtë rezolutë.
Më tej thuhet se me rëndësi është përfshirja e zërave nga opozita në procesin e reformës zgjedhore për të siguruar një qasje të vërtetë përfaqësuese dhe gjithëpërfshirëse.
Gjithashtu, në të bëhet thirrje për një dialog politik konstruktiv dhe gjithëpërfshirës nga të gjitha palët në adresimin e plotë të çështjes “para zgjedhjeve të ardhshme të përgjithshme për të forcuar kulturën parlamentare demokratike të Shqipërisë dhe për të mundësuar një proces të qetë zgjedhor”.
