Pas zërave për një konflikt të fortë në familjen e Doktorit, se kush do ketë në dorë frenat në parti pas Doktorit, Muli ndërmori sot disa hapa konkretë.
Në kuadrin e premtimit të tij publik se do të kujdeset që gara mes Zenit dhe Argitës për kreun e partisë të jetë e drejtë dhe e ndershme, ai vendosi të kompensojë dëmin që i është bërë Zenit nga protagonizmi i Argitës, duke i dhënë poste ekzekutive.
Kështu ai vendosi sot që pronari formal i televizionit Syri.net, Gazmend Spahia, të bëhet koordinator i partisë.
D.m.th Zeni të përfaqësohet drejtëpërdrejtë nga njeriu që drejton bizneset e tij.
Kjo e kompenson pozicionin e tij brenda partisë dhe i jep më shumë dorë televizionit të mos ndihet pa perspektivë në punën që bën për të mirën e partisë.
Po ashtu, dhe emërimi i Ben Qirjakos është në këtë frymë.
Edhe ai, mes Gitës dhe Zenit, anon më shumë nga Zeni.
Ndërkohë dy koordinatorët e tjerë, Klevesi dhe Aureli, janë përzgjedhur si neutralë.
Madje Klevesi ka deklaruar se nuk i njeh fare Gitën dhe Zenin, por vetëm Doktorin.
Kurse Aureli ka deklaruar se është me të tre njësoj.
Kështu që nga llogaritë e para, del që Zeni fiton më shumë nga këto emërime dhe pozita e tij forcohet.
Pasi bëri propozimet, thirri Lelon dhe i tha t’i kushtojë pak rëndësi në media, që të promovohen si katër shpresa të reja për partinë në këto ditë të vështira.
-Dakord mo, tha Lelo, i promovojmë, por duhet bërë kujdes të mos flasin dhe të mos dalin në public, se pastaj na shkon dëm gjithë puna.
