Sot artisti i njohur shqiptar Niko Kanxheri feston 77-vjetorin e lindjes.
Niko Kanxheri, aktor, regjisor dhe pedagog i artit dramatik pranë Universitetit të Arteve, ka lindur Korçë më 17 shkurt të vitit 1947.
Shkollën 8-vjeçare dhe të mesme e përfundoi në qytetin e tij të lindjes, ndërsa studimet e larta i kreu pranë Shkollës së Lartë për aktor që sapo ishte hapur në Tiranë pranë Teatrit Popullor.
Që në kohën kur ndiqte gjimnazin në qytetin e Korçës ai angazhohej me aktivitetet artistike që zhvilloheshin midis gjimnazeve të qytetit. Regjisori Pirro Mani që drejtonte këto aktivitete arriti të dallonte elementët aktorialë dhe talentin që kishte Niko Kanxheri.
Pas përfundimit të studimeve të larta ai u emërua në televizion dhe radio duke realizuar shumë radiodrama në rubrikën “Teatri në mikrofon”. Karriera e tij si aktor filloi për të mos u ndalur më, si në 1971 në filmin “Malet me blerim mbuluar” i Dhimitër Anagnostit. Gjithashtu ka realizuar edhe dy filma si regjisor “Goditja” 1980 dhe “Alo tekniku” 1982.
Që nga viti 1987 dhe deri më sot Niko Kanxheri ka dhënë lëndën e “Mjeshtërisë së Aktorit” pranë UA dhe ku shpesh herë është vlerësuar për suksesin që ka arritur me punët dhe shfaqjet të vëna në skenë me studentët e tij aktor, ku disa prej tyre e kanë vazhduar këtë rrugëtim dhe njihen si ndër aktorët apo aktoret më të suksesshëm të skenës dhe kinematografisë shqiptare.
Ai interpreton në më shumë se 20 filma dhe shfaqje të vëna në skenë, ku do të vlerësohej me disa çmime në festivalet e filmit të zhvilluar në Shqipëri. Disa nga rolet më të rëndësishëm do të veçonim:
NË TEATËR
“Hilet e Natës” 1974, “Një shok i klasës sime” 1975, “Duke pritur Godonë” 1993, “Rinoqeronti” 1998, “Shtrëngata” 1998, “Babai” 2002, “Euridita” 2017.
KINEMATOGRAFI
“Malet me blerim mbuluar” 1971, “Yjet e netëve të gjata” 1972, “Shtigje lufte” 1974, “Në fillim të verës” 1975, “Çifti i lumtur” 1975, “Tokë e përgjakur” 1976, “Vdekja e burrit” 1991, “Vdekja e kalit” 1992, “Parrullat” 2000, “Natë pa hënë” 2001, “I dashur armik” 2004, “Trishtimi i zonjës Shnajder” 2008, “Farmakon” 2012 dhe shumë role të tjerë.
