Gjykata e Vlorës ka dënuar me 18 vite burg Arjan Tasen, ish-policin i cili përplasi me skaf 7-vjeçaren Jonada Avdiaj. Për shkak të gjykimit të shkurtuar, Tase do të vuajë 12 vite heqje lirie.
Tase u gjykua për vrasje me dashje në mënyrë indirekte, teksa me skafin e tij doli në breg, në plazhin e Potamit, për të sjellë familjen e tij dhe i mori jetën një të miture e cila kishte ardhur nga Britania të bënte pushime në jug të vendit me familjen e saj.
Prokuroria e Vlorës më 8 maj 2024 kërkoi deklarimin fajtor të Arjan Tases dhe dënimin me 15 vite burg për “vrasje me dashje”.
“Në konkluzionet përfundimtare, Prokuroria pranë Gjykatës së Shkallës së Parë të Juridiksionit të Përgjithshëm, Vlorë, deklaron se provohet se ditën e ngjarjes, në datën 02.08.2022, rezulton se i pandehuri Arjan Tase, ka qenë në drejtimin e një mjeti lundrues me dy motorë dhe pasi ka lënë disa persona në breg të detit, në momentin që është nisur për të dalë nga zona ku notonte shtetasi B.A. me vajzën e tij Jonada Avdia, mjeti ka marrë shumë shpejtësi duke shkuar në drejtim të tyre dhe në marrjen e kthesës motorat e tij kanë kapur vajzën e mitur duke e prerë në të gjithë trupin. E mitura ndërroi jetë në moment”, njofton Prokuroria.
Në lidhje me të pandehurin Arjan Tase, nga analiza e akteve të administruara gjatë hetimit, kqyrja e vendit të ngjarjes, e pamjeve filmike, provohet të ketë konsumuar elementët e veprës penale të “Vrasje me dashje” në formën e dashjes indirekte.
