Avokati Romeo Kara thotë se ’21 Janari’ është vrasje shtetërore, teksa beson se hetimi nga Prokuroria e Posaçme (SPAK), duhet të bëjë një hetim të hapur.
Në një intervistë për “Tirana Live” në ABC News, Kara u shpreh se SPAK duhet ta zgjidhë çështjen me themel dhe të përballen të gjithë ata që janë të përfshirë.
Ndër të tjera, Kara shtoi se SPAK duhet të fillojë hetim pasuror për çdo politikan.
“Sigurisht që është pozitiv. Kemi parë që politika deri tani abuzoi me këtë çështje, është përdorur politikisht nga të dyja palët. Gjykata e Strasburgut ka vënë pikën mbi ‘i’, kur tha vrasje shtetërore.
Pushtetarët kanë krijuar përshtypje që nuk kanë eksperiencë demokratike për protestat. Janë prishur provat, ka pasur një raport të paprecedent, mes kryeministrit të kohës, kryeprokurores dhe presidentit.
Është vonuar arrestimi i pjesëtarëve të Gardës. Janë dëmtuar serverat, ka prova të reja, duke e çuar në SPAK, janë te prokurorët që mund të përballen me pushtetarë të lartë. Prokuroria e Tiranës nuk ka treguar integritetin që po tregon një pjesë e SPAK.
Mendoj se do të ketë lajme të mira. Do ta shohim hap pas hapi këtë çështje. Shpresojmë që SPAK ta zgjidhë çështjen me themel. Prandaj po ndërtojmë një shtet me ligje, për të na garantuar të drejtat tona. E drejta e protestës së lirë u shkel. Të gjitha të shihen, shkak pasojë.
Unë mendoj që do të kemi hetime, por e falenderoj këtë familje, kur ka vendosmëri, drejtësia nuk është e pamundur në Shqipëri. Këta politikanë, gangsterë me kollarë, e kanë marrë peng këtë vend.
Ka shqiptarë, 2 prej tyre që mbizotërojnë me akte kriminale politikën shqiptare, janë faktor destabilizues edhe për rajonin. Ajo familje ka besuar te e drejta e saj dhe që do fitojë në këtë përballë. Duhet të përballen të gjithë, hetimi të bëhet i plotë. Sali Berishën e vendos në pozitë shumë të vështirë.
Unë mendoj që hetimet më të vështira janë ato për korrupsionin. Ne nuk mund të presim më që këta të kenë kohë, këta të tjetërsojnë pasurinë, e të na shesin moralin nga zyrat e tyre apo nga parlamenti, mund të fillojë me hetimin pasuror.
Të gjithë politikanët nuk mund të hyjnë në politikë pa vetting. Nuk e mendoj të pamundur zbardhjen e çështjes, ky është krim shtetëror, njerëzit duhet të bëhen shembull. Do të shihen mirë detajet. Faktori ndërkombëtar nuk e tejkalon kurrë vrasjet e njerëzve në protestë.
Deri më tani, ne nuk kemi pasur drejtësi dhe kjo çështje ka qenë e varrosur. U hap jashtë palëve. SPAK të fillojë hetimin pasuror për të gjithë politikanët pa përjashtim”, theksoi ai.
