Altin Goxhaj është vendosur nën hetim nga Policia e Tiranës.
Sipas njoftimit të Policisë së kryeqytetit, Goxhaj dyshohet se ka penguar punonjësin e Bashkisë së Tiranës që të kryejë procesin e dezinfektimit.
“Specialistët për Hetimin e Krimeve të Komisariatit të Policisë Nr. 3, kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për veprën penale “Kundërshtimi i punonjësit që kryen një detyrë shtetërore ose një shërbim publik”, parashikuar nga neni 235 i Kodit Penal, në ngarkim të shtetasit Altin Goxhaj.
Më datë 15.08.2024, është paraqitur për kallëzim punonjësi i Bashkisë së Tiranës, shtetasi S.B, 26 vjeç, banues në Tiranë, i cili ka kallëzuar se gjatë dezinfektimit me insekticide, në rrugën “Bardhok Biba”, është penguar për kryerjen e detyrës, nga shtetasi Altin Goxhaj.
Gjithashtu i është marrë kallëzim shtetasit Altin Goxhaj, i cili pretendon se në rrugët e Tiranës janë hedhur lëndë helmuese dhe materialet janë referuar në Prokurori”, njofton policia.
Altin Goxhaj pretendon se Erion Veliaj po helmon banorët e kryeqytetit.
“Si po na helmon Veliaj që prej vitit 2020 me makinat e çuditshme që spërkasin Tiranën me helm pas mesnate.
Në vend që Policia të arrestonte vrasësit e fëmijëve tuaj, Drejtoria e Policisë njofton se ka proçeduar avokatin Altin Goxhaj për pengim të Veliajt për të helmuar Tiranën.
Kam video për përplasjen e djeshme në orët e para të mëngjesit dhe kallzimi penal për Erion Veliajn në 2 të mëngjesit për helmimin shokues të banorëve të Tiranës që bëjnë makina të Bashkisë që hedhin helm fshehtas në rrugët e Tiranës! Përplasja e avokati Altin Goxhaj me punonjësit e Veliajt dhe si Policia konfiskoi provat dhe pastak me urdhër nga lart i shkatërroi provat! Gjithsesi ne kemi mbledhur prova!
Kujtojmë se lloji i spërkatjes së pretenduar kundër insekteve, nuk lejohet për qytetet dhe zonat e banuara por veç për pyjet, arat dhe zonat kënetore pa njerëz pasi nuk lejohet hedhja e pesticideve në ajër nëpër qytete dhe sidomos në fytyrat e njerëzve. Kjo dallohet qartë në shenjat e vendosura italisht në kamionçinat e Bashkisë”, thotë Goxhaj.
Ai u përplas mbrëmë me një punonjës bashkie.
“Stop, stop, ca është kjo që po bën ti. Ca është kjo që po bën ti. Po na helmon si lagje. Hap derën, hap derën, do thërras policinë tani. Hap derën këtu, legen. Hap derën tani.
Ca është ky mut që bën ti te lagjja ime. Ca është kjo gjë që bën. S’ke për të shkuar me asnjë vend, këti do rrish. Do më shtypësh. Dil përjashta tani, ca është kjo që hedh ti legen. Hap derën ej. Këtu do rri unë dhe ti, s’ke ku shkon. Ti s’ke për të shkuar me asnjë vend, mbi trupin tim po, por jo të ikësh. Këtu derisa të vijë policia. Nuk shpëtoni nga kjo histori, ju kapa duke helmuar lagjen time mor legen”, iu drejtua Goxhaj.
“Më ke hedhur helm në surrat, era vaj gur. Ca është kjo që hedh ti te lagja ime. Me lekët e mia do bësh helmimin e lagjes. Ca mutin hedh ti aty. Unë do të fus në burg për vrasje, ty bashkë me kryetarin tënd”, vijoi ai.
