Në një investigim të publikuar nga Gazeta Tema disa ditë më parë, mes listës së pronarëve të tokave në Porto Romano që do të shpronësohen nga qeveria për të ndërtuar portin e ri të Durrësit, rezulton edhe mbesa e Sali Berishës, Shpresa Breçani.
Kontabilistja e disa kompanive që lidhen me histori korrupsioni të familjes Berisha, Shpresa Breçani, posedon të paktën 1.6 hektarë tokë në zonën pranë Porto Romanos.
Nuk dihet se si Shpresa Breçani e ka përfituar këtë pronë dhe cili është roli i Sali Berishës, Argitës, Shkëlzenit dhe Jamarbërit, të përfshirë në aferat me pronat në këtë zonë me Damir Fazlliç dhe klientë të tjerë të Sali Berishës, siç është Ismail Mulleti, i cili dha Shkëlzenit 350 mijë euro për t’i gjetur tokë për të blerë në Porto Romano, ndërsa Berisha i dha më pas kompanisë së Mulletit koncensionin e markimit të karburanteve.
Por Shpresa Breçani posedon një pasuri të frikshme dhe me vlerë miliona euro, në emrin e saj, të bashkëshortit Feriz Breçani dhe të birit Endrit Breçani.
Pasuria përfshin prona nga Gjiri i Lalzit në Tiranë, hotele, lokale, restorante, makina, dhjetëra shtëpi, transaksione, kompani ndërtimi, shërbime kontabiliteti, shërbime ligore, konsulencë juridike, materiale ndërtimore etj.
Endrit Breçani rezulton bashkëpronar i Kafe Flora, në Rrugën Mine Peza në Tiranë si dhe i një godine në Rezidencën Primavera në Gjirin e Lalzit, përshtatur si hotel, bar dhe restorant.
Shpresa dhe Endrit Breçani janë pronarë të një tjetër hoteli në Gjirin e Lalzit, që përfshin bar restorant, fast-food, lojra argetuese, pishina etj.
Endrit Breçani është bashkëpronar i një tjetêr lokali në Tiranë si dhe aksioner në disa kompani ndërtimi, hotelerie dhe restorantesh.
Bashkëshorti i Shpresa Breçanit, Feriz Breçani rezulton pronar i kompanisë së ndërtimit HFE CONSTRUCTION, në Ishëm të Durrësit, themeluar vitin e kaluar dhe me rritje kapitali në 360 mijë euro.
Shpresa, Feriz dhe Endrit Breçani posedojnë toka, disa vila dhe apartamente nga Gjiri i Lalzit në Tiranë.
Disa ditë më parë, kreu i SPAK-ut Altin Dumani tha se ka pasur një hetim pasuror për Sali Berishën. Nuk dihet nëse hetimet kanë përfshirë edhe tarafin e Familjes Berisha.
Faktet tregojnë se Shpresa Breçani është person i afërt dhe i besuar i Familjes Berisha për auditime dhe kopsitje bilancesh në kompani të lidhura me afera korruptive.
Emri i Shpresa Breçanit rezulton në dosjen e SPAK-ut për aferën me ish Klubin Partizani, për të cilën janë izoluar me vendim gjykate Sali Berisha me dhëndrin Jamarbër Malltezi, me akuzën e korrupsionit dhe pastrimit të parave.
“Gjithashtu në këtë vendim është përcaktuar edhe emërimi i shtetases Shpresa Breçani si auditor kontabël e shoqërisë Homeplan sh.p.k. për vitin fiskal 2016. Është për t’u theksuar se shtetësja Shpresa Breçani që vendoset si audituese, rezulton të jetë e afërme e familjes Berisha, i deklaruar ky fakt nga vetë shtetasi Xhimi Begeja dhe pouar nga shtetasi Fatmir Bektashi se Andia i ka rekomanduar shtetasen Shpresa Breçani. Në vitin 2016, nuk rezultojnë nga dokumentat e sekuestruara pranë studio Pustina apo ato të gjendura nëpër kompjutera që të jenë evidentuar dhënie parash në formë “dividenti” shtetasit Jamarbër Malltezi, pas rakordimeve të kryera, por vijojnë të pasqyruara dhënie parash në subjekte të treta në formën e kontributit patriotik“, thuhet në dosje.
Zonja Breçani ka mbajtur edhe qëndrim kur u arrestua dhëndri i Berishës, me kërkesë të SPAK, për aferën me ish Klubin Partizani.
Shpresa Breçani duket se jo rastësisht rezulton edhe kontabliste e firmës “ALPHA”
të Damir Fazlliç, shtetasi boshnjak i hetuar në Bosnje dhe Kroaci për pastrim parash, kontrabandë cigaresh (por dhe i skeduar për trafik ndërkombëtar të armëve) ka arritur të pastrojë dhe të fshehë të paktën 1.7 milion euro gjatë aktivitetit të tij tre vjeçar në Shqipëri, në bashkëpunim me Argita Berishën dhe Jamarbër Malltezi, me pronat në Porto Romano.
Emri i Shpresa Breçanit del edhe si audituese e pasqyrave financiare të ndërmarrjes “MEICO” dhe të Uzinës së Poliçanit. “MEICO” kishte rol kyç në aferën korruptive të Gërdecit, me 27 viktima, biznes pas të cilit qëndronte Shkëlzen Berisha.
Mediat kanë botuar dokumente që provojnë se mbesa e Berishës Shpresa Breçani ka shërbyer si eksperte kontabël në një nga kompanitë e mëdha të basteve të hapura në Shqipëri nga Albino Prudentino, një prej drejtuesve kryesorë të organizatës kriminale mafioze “Sacra Corona Unita”.
Shpresa Breçani ka bërë edhe analizën financiare të pasurive të Altin Hajrit, i cili ishte ndër të dyshuarit për rrëmbimin dhe zhdukjen e Prengës, trupi i të cilit nuk është gjetur sot e kësaj dite.
Në analizën e saj Breçani arriti në konkluzionin se raporti i të ardhurave dhe shpenzimeve të Altin Hajrit është plus 18 milionë lekë të reja dhe ai i justifikon burimet e financimit të kompleksit. Megjithatë, bie në sy fakti se vlera e pasurive të paluajtshme dhe të luajtshme të resortit “Golden” vlerësohen 46 milionë lekë të reja. Pra, me këtë shumë në dukje modeste është vlerësuar ky investim gjigant që shihni i përbërë nga 3 godina luksi, pishina dhe lulishte.
Më 28 shkurt 2024, mbesa e Sali Berishës Shpresa Breçani është përzgjedhur nga gjyqtari Niko Rapi, për procesin e falimentimit të televizionit “ALSAT” të Rezart Taçit, i cili ka financuar Liri Berishën, duke i blerë piktura, ndërsa Berisha i dha monopolin e pikave të karbiranteve në vend.
