Presidenti turk Erdogan në bashkëpunim me kryeministrin Edi Rama kanë nisur zbatimin e projektit të mbetur në sirtar për shumë kohë për të marrë në zotërim një pjesë të Komunitetit Mysliman Shqiptar. Mësohet se përmes presioneve po krijohen strukturat që Xhamia e Namazgjasë, e njohur edhe si Xhamia e Madhe e Tiranës të jetë nën kontrollin e Erdogan dhe jo të kreut të KMSH, Bujar Spahiu. Ky i fundit konsiderohet nga shteti turk si një njeri pranë fondacionit FETO (gylenist), pasi ka studiuar përmes ndihmesës me bursë nga një nga fondacionet e themeluara nga Fetullah Gylen.
Armiqësia e njohur e Erdogan me rrjetin Feto është kthyer në kufirin që presidenti turk ka vendosur në miqësinë e tij me Shqipërinë dhe kryeministrin Edi Rama. Teksa Rama thotë se nuk i kanë asnjë borxh presidentit turk për të dorëzuar anëtarët e lëvizjes Gylen, xhamia e Namazgjasë është bllokuar, pikërisht nga qëndrimet e Ramës, i cili nuk i ka plotësuar dëshirat “Sulltant”.
Punimet vazhdojnë për më shumë se 9 vite që nga viti 2015, kur nisi edhe hedhja e themeleve. Duhet të përfundonte në vitin 2022, pasi Erdogan premtoi se do të vinte në Shqipëri për Bajram dhe do të inauguronte vetë xhaminë e Namazgjasë. Erdogan nuk erdhi kurrë. Por pas telefonatës së fundit Rama-Erdogan, Xhamia e Madhe do të zhbllokohet dhe në këtë mes fshihen pazare të pista.
Edi Rama përdor SHISH për presione
Për të arritur këto marrëveshje të fshehta ka luajtur një rol shumë të rëndësishëm drejtori i Shërbimit Informativ Shtetëror (SHISH) dhe drejtori i Departamentit të Krimit të Organizuar dhe Zbulimit në SHISH, të cilët me urdhër të drejtoreshës Vlora Hyseni i kanë bërë presione kryetarit të KMSH Bujar Spahiut që të qëndrojë larg Xhamisë së Madhe. Në mënyrë që Erdogan t’i hapë rrugë inaugurimit, Z.Spahiut i janë vendosur kushte mbi tavolinë. Si fillim ai duhet të bie dakord që administrimin ta marrë në duar Myftiu i Tiranës Bilal Teqja, personazh i cili deri më tani nuk ka patur asnjë kontestim nga filoerdoganistët e Komunitetit Mysliman.
Madje kryeministri Rama e ka promovuar pas fitores duke e marrë në një intervistë në podkastin e tij. Z.Spahiu ka rënë dakord që ai ta marrë administrimin e Xhamisë së Madhe, por nuk pranon që të hedhë firmë që ai të ketë kontroll të plotë të saj. Kushtet e tjera që palët kanë rënë dakord është që Xhamia e Madhe të administrohet nga 4 imamë.
Konkretisht, dy nga qendra, pra Komuniteti Mysliman dhe dy nga Myftiu i Tiranës që është njeriu i Erdoganit. Ndërkohë është futur në lojë edhe Myftiu Ahmed Kalaja, i cili do jetë pjesë pazarit për Xhaminë e Madhe. Në finale, Edi Rama në këmbim të kësaj marrëveshje të fshehtë do të shpërblejë Komunitetin Mysliman, pra si gylenistët ashtu edhe erdoganistët me dy deputetë në zgjedhjet e ardhshme parlamentare. Për gjithë këtë ngjarje, mësohet se është vënë në dijeni edhe Ambasada Amerikane në Tiranë. Megjithatë mbetet të shihet se si do të shkojë pazari.
Por një gjë është e sigurt. Nuk është hera e parë që Bujar Spahiut i bëhen presione. Atë e kanë kërcënuar edhe me jetë. Pak kohë më parë një person me background kriminal dhe i armatosur ka hyrë në zyrën e Bujar Spahiut dhe i ka kërkuar të largohet. Jo vetëm kaq, përmes të mësohet se edhe dy biznesmenë të fuqishëm në Shqipëri janë takuar disa kohë më parë me kreun aktual të KMSH dhe i kanë kërkuar që të bëjnë një tërheqje fiktive nga detyra. Deri më tani Edi Rama ka vënë në kontroll televizionin ABC, që ka qenë në duart e gylenistëve, por edhe disa shkolle e kopshte që janë mbyllur pas ultimatumit të Erdogan.
