Gazetarja Juela Meçani, një nga miket më të ngushta të Gerti Bogdanit, ka treguar njohjen me të, por dhe si e përjetoi lajmin tragjik të një dite më parë.
E pranishme në “Quo Vadis” në Vizion Plus të moderuar nga Pranvera Borakaj, Meçani tha se Gerti ishte një nga figurat më të mira të politikës, nga ata djem që nuk u bënë pis.
Ajo tregoi gjithashtu se Ger Bogdani nuk ishte pjesë e asnjë klani, por ishte i gatshëm të ndihmonte në çdo moment.
Si ka qenë njohja, marrëdhënia me Gert Bogdanin?
Jam ruajtur shumë këto dy ditë, për tu bërë padashur patetike. Kam reagur vetëm për ndonjë të afërm të familjes time.
Pak a shumë më ka ndodhur e njëjta histori me xhaxhain tim. Për Gertin e ndjeva shumë, për atë që ai ishte, për moshën e re, për atë që ai kishte ndërtuar, familjen.
Kishte arritur të mos bëhej pis në politikë. Ka qëlluar që unë, Gerti të fillonim politikën në të njëjtën kohë në vitin 2005-së.
Unë rikthehesha ndërsa Gerti po ringrihej. Kemi qenë bashkë në çdo takim të EPP-së, Brukseli na ishte bërë si shtëpi.
Na bashkonte dhe diçka tjetër që është shumë e rëndësishme. Ne ishim ujq të vetmuar. Ne punonim për bindjen që kishim, nuk punonim me klan.
Kishim zgjedhur mos bëheshim pjesë e atyre klanizmave të vegjël që i kanë të gjithë forcat politike. Gerti ishte shumë i qetë, i përjetonte dhe shumë padrejtësitë.
