“Lidhe lotin me rrip sigurimi”
Nulit dhe Gazit të bardhë, më në fund u erdhi dita e provës, të rrëzonin Ramën medoemos, sepse kështu kishte urdhëruar lideri suprem Saleh Ajetollah Berisha.
Për këtë thirrën me ditë të tëra lartë e poshtë, sikur po u ofronin qytetarëve një guidë turistike nga Partia Demokratike, falas, me bukë e gjizë dhe molotov.
Të gënjyerit kryesor ishin turma nga zonat rurale, që nuk i lidh asgjë me këtë kryeqytet, por me dëshirën e madhe për të parë Tiranën, që ndoshta edhe pamundësia ekonomike nuk ua mundësonte këtë kënaqësi dhe për të luajtur kukafshehti me tabelat, duke thyer xhama e djegur pemë, hedhur flakë ku tu donte qejfi, mundësira që prindërit e tyre që i kishin lëshuar në rrugë, nuk do ua krijonin kurrë brenda avllisë së tyre.
Meqë guida turistike e kishte logon “Mosbindje Civile”, Muli me Bardhin as vetë nuk po e kuptonin, se si të mos bindeshin kur ato vetë e kishin filluar me bindje, duke iu drejtuar policisë për leje, madje Bardhi, pasi i ishte bindur se nuk do ndodhte asgjë, kishte marrë në polici atributet e drejtuesit të protestës.
Tirana më datë 7 Tetor do të përjetonte atë që nuk e kishte përjetuar ndonjëherë, mosbindjen më të madhe civile, ku turistët e ardhur nga çdo zgafellë e Shqipërisë, ku ka ende njerëz që i tremb drita, do na gëzonin më 8 Tetor qeverinë teknike, me kryeministër Sali Berishën.
Por, Muli dhe Bardhi, që megjithëse kanë zbritur herët në kryeqytet, rrugët i kanë mësuar vonë, ndaj nuk kishin parashikuar se para se të protestojnë si grup turistik i frikshëm, u duhej patjetër të gjenin një guidë turistike, për tu treguar ardhacakëve të tyre vendndodhjen ku do të protestojnë, qëllojnë, djegin dhe shkatërrojnë, sepse gabimisht mund të humbasin busullën mes tollovisë së makinave dhe njerëzve në kryeqytet.
Ndaj, për herë të parë morën përsipër detyrën e vështirë të ciceronit, duke i sorollatur njerëzit pa asnjë pikë mbërritjeje të caktuar, madje i çuan të pinin dhe pak gaz me Gazin e Bardhë dhe inë fund i prezantuan me kryeveprat e fundit të arkitekturës moderne, Xhaminë e Namazgjasë.
Turi prej 6 orësh më në fund përfundoi me njerëz të raskapitur por të lumtur, se diçka kishin përfituar…. kishin parë kryeqytetin dhe kishin mësuar se si mund të digjet ai kur drejtohesh nga kjo kategori njerëzish që Sefer Daja i quante: “Katunar kaptin parur, qytetar nuk bohesh kurrë, sikur t’ndrrosh njiqin lëkurë”…
Nga turi i gjatë në kryeqytet, ndodhi që në strofullën SHQUP, turistët kishin firuar dhe kishin mbetur vetëm një turmë gazetarësh dhe simpatizantësh, që kur Muli i përshëndeste për mundimin dhe vuajtjet që kaluan në atë kalvarë ecjesh dhe djegiesh thërrisnin: Berisha, Berisha.
Enigëm mbetet fati i tyre, e dikush duhet të na sqarojë, se çfarë ka ndodhur me këta “turistë”, që u katandisën si kokoshi një thelë?! Mbetemi në ankth të një përgjigje! A i ka orientuar kush për të gjetur rrugën për tu kthyer në shtëpi, apo kanë fjetur në parqet e qytetit, duke pritur që të zbardh dita e nesërme, që turi turistik të vazhdojë, siç ua pati premtuar Muli?! /Ekskluzive.al
