Një futbollist peruan, mbrojtësi José Hugo de la Cruz Meza, humbi jetën të dielën, pasi u godit nga rrufeja në fushë. Episodi ndodhi në stadiumin “Coto Coto”, në Chicha, rajonin e Huancayo të Perusë, ku dy skuadrat lokale, Juventud Bellavista dhe Familia Chocca, po luanin nën një rrebesh shiu.
Videot e këtij momenti tragjik tregojnë me saktësi se rrufeja godet disa futbollistë, të cilët njëkohësisht rrëzohen në barin e fushës. Në fakt, rrufeja goditi pak sekonda pasi loja u ndërpre nga arbitri për shkak të stuhisë, teksa lojtarët po largoheshin nga fusha drejt dhomave të zhveshjes.
Mediat lokale raportuan se të plagosurit u transferuan menjëherë në spitalin “Carrión” të Huancayo, ku mjekët konfirmuan vdekjen e de la Cruz Meza. Ka mbetur edhe një i plagosur rëndë, portieri Juan Choca, i cili ka pësuar disa djegie.
