“Shkatërrove shtetin në ’97, je përgjegjës për 26 qytetarë të vrarë në Gërdec dhe për fatin e dëshmitarit Kosta Trebicka.”
Sot Meta dhe Berisha janë aleatë, të bashkuar nga halli i madh që secili prej tyre ka me drejtësinë, sepse Ilir Meta është në burg i akuzuar për korrupsion, ndërsa Berisha është në arrest shtëpie, gjithashtu i akuzuar për korrupsion.
Ilir Meta dhe Sali Berisha janë dy prej protagonistëve kryesorë të zhvillimeve politike në Shqipëri gjatë 34 viteve të fundit. Herë si kundërshtarë e shpesh si bashkëpunëtorë, ata kanë pasur një ndikim të rëndësishëm në politikën e vendit. Kjo temë sjell në vëmendje një periudhë kur ata ishin në një betejë të fortë akuzash mes tyre. Ky ishte momenti kur Berisha ishte në mandatin e parë si kryeministër dhe Meta ishte në opozitë si kryetar i LSI-së. Përplasja mes tyre lidhej me ndryshimet kushtetuese, por nuk kursyen njëri-tjetrin me akuza të ashpra për korrupsion gjatë drejtimit të vendit. Në një seancë parlamentare të vitit 2008, Meta hodhi akuza të rënda ndaj kryeministrit Berisha për ngjarjen e Gërdecit dhe lidhjet e tij me biznesmenin serb Fazlliç.
Berisha, nga ana tjetër, i kundërpërgjigjej me të njëjtën ashpërsi, duke e quajtur Metën “Ilir Floriri” dhe duke e akuzuar për grabitjen e floririt në Kërrabë.
Deklaratat e Ilir Metës:
“Kosta Trebicka, qytetari më kurajoz që dëshmoi kundër korrupsionit, humbi jetën. Nuk dua të marr përsipër atributet e prokurorisë dhe ekspertëve vendas e ndërkombëtarë, por me bindje them se opinioni publik është tronditur nga kjo humbje, qoftë edhe nëse ajo ka qenë aksidentale. Do të doja të dija nëse është e vërtetë ajo që një tjetër banor deklaroi në televizionin ‘Top Channel,’ se në momentin që i ndjeri po jepte shpirt dhe u njoftuan organet e rendit, atij iu kërkua të mos e preknin derisa të vinte policia. Pavarësisht çdo lloj aksidenti, për çdo person bëhet gjithmonë përpjekja për t’i dhënë ndihmën e parë.
Ky kryeministër i përgjegjshëm, i cili është akuzuar për një skandal të përmasave të tmerrshme, ku kanë humbur jetën 26 qytetarë, nuk u interesua nëse ky dëshmitar ose të tjerë janë në mbrojtje nga shteti për shkak të aferës me përmasa të mëdha. Në vend që të ishte i hetuari i parë i prokurorisë, ai guxon të dhunojë hapur këtë institucion të pavarur, sipas Kushtetutës së Republikës së Shqipërisë.”
Përgjigja e Berishës:
Sali Berisha – “I nderuar zoti kryetar i seancës, fillimisht, më lejoni të shpreh kënaqësinë që ju drejtoni këtë seancë. Opozita nuk reagon kundër hetimit të pavarur për shkak të Fazlliçit, por nga frika se nesër hetuesit ndërkombëtarë do të nxjerrin se ai atje nuk quhet Ilir Meta, por Ilir Floriri. Hetimin e vendos shumica në Parlament dhe për këtë jeni të sigurt. Ky Parlament do të veprojë në interesin më të mirë të këtij vendi dhe të transparencës. Ju shikoni në ëndrra veten tuaj dhe për këtë nuk e kam unë fajin; e keni vetë ju.”
Berisha i përforcoi akuzat ndaj Metës për grabitjen e floririt, duke deklaruar se thesari i shtetit ishte vjedhur në ’97 dhe më pas Meta u përpoq ta faturonte te të tjerët.
Kundërpërgjigja e Ilir Metës:
“Pavarësisht nga ky luks dhe komfort që kapobanda e shtetit dhe Qeverisë gëzon, unë dua ta siguroj se Berisha do të përgjigjet para drejtësisë për të gjitha, përfshirë edhe për floririn e Kërrabës që e vodhi vetë në ’97. Edhe për floririn që u ka dhënë Fazlliçit dhe të tjerëve do të përgjigjet,” do të deklaronte Meta.
Kanë qenë të shumta momentet e përplasjeve mes tyre, madje në arkiva gjenden akuza të ndërsjella për çështjet për të cilat ata sot janë të arrestuar CEZ DIA dhe privatizimin e ish-klubit Partizani.
Sot Meta dhe Berisha janë bërë aleatë për shkak të problemeve me drejtësinë; Meta është në burg për korrupsion, ndërsa Berisha është në arrest shtëpie për të njëjtën akuzë./ TemA
