Për t’i dhënë më shumë zemër protestuesve për ditën e martë, Muli njoftoi se sot emrat e heronjve ilegalë që u dhunuan në Londër nga bandat e Edi Ramës në bashkëpunim me policinë britanike, do të shkruhen me gërma të arta në Murin e Shqupit duke u shpallur “Trima të demokracisë”.
Duke marrë fjalë në mbledhjen finale të përgatitjeve për mitingin, Muli tha:
– Është detyra jonë që nesër të marrim hakun e atyre dhe këtij trimave ilegalë në zemër të Londrës që u përleshën dhëmb për dhëmb me Edi Ramën. Ata sakrifikuan aty gjënë më të shtrenjtë që kanë, lirinë në shtetin britanik, pasi pas kësaj mund t’i deportojnë në Shqipëri.
Por ata nuk do të jenë të vetëm, por do të jenë të nderuar. Ata do të gjejnë këtu simbolin e demokracisë shqiptare, Sali Berishën, që po ashtu është dënuar si ata nga qeveria britanike duke u shpallur ‘non grata’. Ky dënim padyshim është nderi i demokracisë shqiptare. Ata që e japin këtë janë turpi i demokracisë botërore.
Dhe nuk do gjejnë vetëm Doktorin, por dhe mua, që po ashtu vuaj pasojat e kësaj padrejtësie të madhe.
Ndaj nesër ne duhet të luftojmë për ata, jo vetëm për mua dhe Doktorin.
– Kisha një pyetje, tha deputeti i Shalqini nga Lushnja.
– Fol, i tha Muli.
– Në çfarë ore vijnë ata? Se mos mi dërgojnë këtu në Kombinat se s’ja dal dot vetëm.
– Nuk jam i sigurt, tha Muli, po nuk besoj që vijnë dot deri nesër. Pritet në ditët në vijim.
