Deputeti i PD Dashnor Sula i ftuar në studion e News24 është përfshirë në një debat me gazetarin Anri Bala në lidhje me përcaktimin e datës së zgjedhjeve të vitit të ardhshëm dhe rolin e presidentit Bajram Begaj në këtë çështje.
Pjesë e debatit ishte një akuzë nga Sula ndaj Kryeministrit Edi Rama për shpërndarjen e bonuseve në periudhën afër zgjedhjeve, duke e cilësuar këtë si një tentativë për të blerë vota nga pensionistët.
“Kryeministri tha se do të japë bonus në fund të vitit. Po, edhe rrugët janë bërë në fund të vitit. Ai do të japë dhe bonus në pranverë, po blen votën e pensionistëve. Nuk lejohet të japësh lekë, tendera, asgjë para zgjedhjeve,” tha Sula gjatë debatit.
Bala e pyeti Sulën për merakun e tij në lidhje me shpërndarjen e bonusëve dhe veprimet e qeverisë, por Sula e bëri të qartë se sipas tij, ligji zgjedhor është i qartë dhe nuk lejon asnjë formë të ndërhyrjes financiare afër zgjedhjeve.
Pjesë e debatit u bë edhe diskutimi mbi rolin e Presidentit Bajram Begaj në përcaktimin e datës së zgjedhjeve. Sula e cilësoi presidentin si një “zar” të qeverisë, duke e akuzuar për mungesë pavarësie dhe ndikim të theksuar nga qeveria.
“Presidenti është një zar i kësaj qeverie, është zar mo çun,” u shpreh Sula, duke shtuar se ai mund të kishte vendosur një datë më të hershme për zgjedhjet, duke iu referuar mundësive që ligji zgjedhor parashikon për periudhën nga 15 prilli deri më 15 maj.
Bala e pyeti Sulën nëse kjo do të ndikonte në fitoren e PD-së në zgjedhjet e ardhshme. Deputeti i PD-së, megjithatë, theksoi se ishte një çështje parimore dhe se veprimet e qeverisë do të pasqyroheshin në rezultatet zgjedhore.
“Ble pensionistët, përdor bandat dhe pastaj thoni pse nuk fitoni në zgjedhje,” shtoi Sula, duke e akuzuar qeverinë për përdorimin e mjeteve të ndaluara për të siguruar mbështetje gjatë fushatës zgjedhore.
Pjesë nga debati:
Sula:Kryeministri tha do japim bonus në fund të vitit.
Bala: Edhe rrugët janë bërë në fund të vitit.
Sula:Ai do japë edhe bonus në pranverë, po blen votën e pensionistëve. Nuk lejohet të japësh lekë, tendera asgjë.
Bala: Po ku është meraku juaj.
Sula:Ore ju jeni të lezetshëm, nuk njeh ligjin elektoral, etj. Nuk lejohet asgjë.
Bala: Ka afate.
Sula:Po ka zgjedhje se më çmende.
Bala: Nuk ka lidhje me vjedhjen
Sula:Ligji zgjedhor nuk e lejon. Kryeministri tha do japë bonus në pranverë. Atëherë janë zgjedhjet. Presidenti është një zar i kësaj qeverie, është zar mo çun.
Bala: Po fituat zgjedhjet ju si i bie?
Sula:E ka përcaktuar kodi, 15 prill dhe 15 maj. Bëje në fund të prillit, pse nuk e bën? Ke 4-5 data përpara.
Bala: Unë thashë kjo nuk zbeh punën e qeverisë në 12 vite, a i’u ndihmon kjo të fitoni në zgjedhje?
Sula: Është parimore pra. Ble pensionitët, përdor bandat edhe thuaj pse nuk fitoni pastaj.
