Kreshnik Spahiu ka folur për zgjedhjet e 11 majit 2025, kush i fiton dhe si ridimensionohet politika shqiptare.
Për Spahiun, dy partitë e mëdha do jenë ende në politikën shqiptare, madje edhe më të forta për fat të keq, pasi ato e kanë mbyllur misionin e tyre dhe shqiptarëve u duhet një alternativë e tretë.
Madje ai tha në Report TV se për dinamikën që kanë ndjekur këto dy parti të mëdha dhe veprimet e kundraligjshme, në çdo shtet tjetër do ishin shpallur të jashtëligjshme.
“Nuk pres asnjë surprizë. Rama shkon drejt një mandati tjetër. Unë mendoj se Rama dhe Berisha do vazhdojnë të drejtojnë politikën shqiptare. Do dëshiroja që të dyja PD e PS të dilnin më të dobëta, për të mirën e shqiptarëve, kanë humbur misionin e tyre historik.
Në disa aspekte kanë kryer veprimtari antikushtetuese. Po të ishte në një shtet tjetër, ndoshta ndonjëra prej tyre mund të kishin dalë edhe jashtë ligjit. Është e paprecedentë. Nuk ka ndodhur as në Europë, por as në Afrikë, nuk ndodh në Nigeri, që brenda një partie të marrin hurin, të marrin shkallët, të blindohen dyert, gjysma poshtë si në kohët mesjetare me shkallë të ngjiten, gjysma tjetër me hunj e me sopata, duke përzënë tjetrën.
Nga ana tjetër janë krijuar 5 parti brenda një partie. Kësaj partisë tjetër që është në pushtet nuk i ka ngelur asnjë burrë, i kanë mbetur vetëm gra, sepse burrat janë nën arrest, nën procedim penal etj. Pra këto parti e kanë mbyllur misionin e tyre historik, pra duhet të kishte një dinamikë apo konfigurim politik siç e ka Kosova, me 5 dhe 6 parti që marrin 18, 20, 22 deputetë, jo në nivele të larta”, shprehet Spahiu.
Dhe ai parashikon zhvillime negative më 11 Maj, pasi skema dhe infrastruktura është ngritur posaçërisht që të kemi vetëm 2 parti parlamentare, PD-PS, pra dy të këqija dhe pa alternativë të tretë.
“Por kjo s’mund të ndodhë, sepse e shoh një nga ngjarjet më negative që pritet më 11 Maj, se në radhë të parë skema dhe infrastruktura janë përgatitur që për herë të parë të kemi një parlament dypartiak. Të ngelen vetëm PS e PD, për t’i shkrirë të gjithë.
Kjo është dëshira dhe strategjia e Ramës dhe Berishës që të jenë vetëm dy të këqija në Parlament, për t’iu imponuar ndërkombëtarëve apo SPAK-ut dhe gjithë institucioneve të drejtësisë, për t’i vendosur shqiptarët pa alternativë të tretë, se s’ka mënyrë tjetër, o me njërin, o me tjetrin. Në një farë mënyre gjithë procesi politik po shkon drejt këtij rezultati.
Vetëm nëse ka çudira, por çudirat mund t’i bëjë vetëm Prokuroria Speciale deri më 11 Maj. Nëse nuk do të ketë vendime të nivelit të lartë. Niveli i lartë janë Rama dhe Berisha, gjithë të tjerët janë ushtarë, nuk e ndryshojnë rezultatin zgjedhor, vetëm nëse ndodh që të krijohet parti brenda PS, por edhe nëse ndodh nuk ka kohë.
Nuk ka kohë krijimi i një partie politike në dy muaj, nuk ndodh, e pamundur, pas dy muajsh bëhet regjistrimi në KQZ dhe më duket e pamundur përçarja brenda e PS nuk ndodh, është iluzion”, përfundon ai.
