Qeveria e Izraelit ka miratuar marrëveshjen me Hamasin për armëpushimin në Gaza dhe lirimin e pengjeve, e nënshkruar gjatë natës mes të enjtes dhe të premtes në Doha (16 – 17 janar) . Marrëveshja do të hyjë në fuqi të dielën, më 19 janar. Këtë e ka bërë të ditur zyra e kryeministrit Benjamin Netanjahu. Sipas mediave izraelite, 24 ministra kanë votuar pro, ndërsa tetë kanë votuar kundër.
Kjo marrëveshje ka dy faza. Nëse faza e dytë dështon, lufta do të rifillojë me mbështetjen e SHBA-së,” paralajmëroi kryeministri izraelit.
“Kam marrë garanci të qarta nga Biden dhe Trump.”
Të dielën do të lirohen tre pengjet e parë. Në total, 33 persona të rrëmbyer më 7 tetor do të lirohen. Mes tyre janë edhe të vegjlit Bibas, por nuk dihet nëse janë gjallë. Në listë përfshihen dhe 5 vajzat ushtarake izraelite. Do të lirohen gjithashtu 1,700 të burgosur palestinezë.
Sipas marrëveshjes, 33 pengje izraelite që mbahen ende nga Hamasi në Gaza pas 15 muajsh konflikti do të shkëmbehen me qindra të burgosur palestinezë në burgjet izraelite gjatë fazës së parë që zgjat gjashtë javë.
Forcat izraelite gjithashtu do të tërhiqen nga zonat e dendura të banuara të Gazës, palestinezët e zhvendosur do të lejohen të fillojnë të kthehen në shtëpitë e tyre dhe qindra kamionë ndihmash do të lejohen të hyjnë në territor çdo ditë.
Negociatat për fazën e dytë – e cila pritet të sjellë lirimin e pengjeve të mbetura, një tërheqje të plotë të trupave izraelite dhe “rivendosjen e një qetësie të qëndrueshme” – do të fillojnë ditën e 16-të.
Faza e tretë dhe e fundit do të përfshijë rindërtimin e Gazës – një proces që mund të zgjasë me vite – dhe kthimin e trupave të pengjeve të mbetura, nëse ka.
Izraeli thotë se tre pengje pritet të lirohen ditën e parë të armëpushimit, ndërsa grupe të vogla do të lirohen në intervale të rregullta gjatë gjashtë javëve të ardhshme.
Ushtria izraelite nisi një fushatë për të shkatërruar Hamasin – i cili është i klasifikuar si organizatë terroriste nga Izraeli, SHBA dhe të tjerë – si përgjigje ndaj një sulmi të paprecedentë ndërkufitar më 7 tetor 2023, ku rreth 1,200 njerëz u vranë dhe 251 u morën peng.
Sipas Ministrisë së Shëndetësisë të drejtuar nga Hamasi në Gaza, që nga ajo kohë mbi 46,870 njerëz janë vrarë në Gaza. Shumica e popullsisë prej 2.3 milionësh është zhvendosur, ka shkatërrime masive dhe mungesa të rënda ushqimi, karburanti, ilaçeve dhe strehimit për shkak të vështirësive për të dërguar ndihma tek ata që kanë nevojë.
Izraeli thotë se 94 pengje ende mbahen nga Hamasi, prej të cilëve 34 mendohet të jenë të vdekur. Përveç kësaj, ka edhe katër izraelitë të rrëmbyer para luftës, dy prej të cilëve kanë vdekur.
