Donald Trump i është rikthyer deklaratës së tij për zhvendosjen e banorëve të Gazës në Jordani dhe Egjipt, duke thënë se palestinezët do të jetonin më mirë në një vend “ku nuk ka dhunë”.
“Unë do të doja që ata të shkojnë në një zonë ku mund të jetojnë pa trazira, revolucione dhe dhunë,” u tha presidenti amerikan gazetarëve në bordin e Air Force One.
I pyetur nëse ky pozicion do të thotë se ai nuk beson më në një zgjidhje me dy shtete, Trump shmangi përgjigjen drejtpërdrejt, duke thënë se do ta diskutojë këtë çështje me kryeministrin Benjamin Netanyahu kur të vijë në Uashington për ta takuar.
Dy burime konfidenciale i thanë Times of Israel dje se zyra e Netanyahut po planifikon që kryeministri të udhëtojë në Uashington të dielën, ku ai do të takohet me Trump në fillim të javës përpara se të kthehet në Izrael të mërkurën.
Udhëtimi ende nuk është finalizuar dhe do të varet nga shëndeti i Netanyahut, i cili po rikuperohet nga operacioni i prostatës.
